«Առաջին լրատվական»-ի զրուցակիցն է Լիբերալ կուսակցության նախագահ Հովհաննես Հովհաննիսյանը:
–Պարոն Հովհաննիսյան, Դուք եռյակին աջակցելու նախաձեռնությամբ հանդես եկաք։ Ի՞նչ եք կարծում՝ հանրահավաքների տևական դադարն ի՞նչ ազդեցություն կունենա շարժման վրա: Հնարավո՞ր է այս կերպ հաջողության հասնել:
-Իսկապես և՛ մենք, և՛ բազմաթիվ կուսակցություններ, քաղաքական ուժեր միավորվում ենք համաժողովրդական շարժման մեջ և իհարկե՝ ունենք այն ակնկալիքը, որ շարժումը կտանի երկրում համակարգային փոփոխությունների, երկրում կձևավորվի ժողովրդավարություն, կանցկացվեն ազատ և արդար ընտրություններ, և կլինի այն բոլորը, ինչ անհրաժեշտ է, որ մեր հասարակությունը ոտքի կանգնի, ու Հայաստանը դարձնենք ընդունելի ու հայ ժողովրդի համար ապրելու երկիր: Մարդիկ պետք է ոչ թե մեր երկրից գնան, այլ վերադառնան հայրենիք:
–Ինչքանո՞վ է Ձեր համար ընդունելի եռյակի արտաքին քաղաքական կուրսը, բացառությամբ «Ժառանգության»՝ մնացած երկու ուժերը կողմ քվեարկեցին Հայաստանի՝ Եվրասիական տնտեսական միությանն անդամագրվելու համաձայնագրին: Դուք մշտապես այլ քաղաքական վեկտորի կողմնակից եք եղել, կարևորել Հայաստան-ՆԱՏՕ համագործակցությունը: Դա չի՞ խոչընդոտում Ձեր համագործակցությանը եռյակի հետ:
–Ես և մեր կուսակցությունը մեր դիրքորոշումները չենք փոխել և մնում ենք նույն կարծիքին, բայց անխուսափելիության խնդիր կա:Պետք է հասկանանք, որ Եվրասիական տնտեսական միությանն անդամակցությունը համագործակցություն է երեք երկրների հետ, և այս դեպքում Հայաստանն է տնօրինում իր ճակատագիրը: Պետք է նաև ասեմ, որ Հայաստանը անգամ հիմա շարունակում էիր համագործակցությունը Եվրամիության հետ, դա մենք վերջին երկու-երեք օրը տեսնում ենք ՝ գործող նախագահի գլխավորությամբ: Պետք է կարողանանք Եվրամիության հետ նոր սկզբունքներով, նոր էջից նոր պայմաններով համագործակցություն շարունակել:Կարծում եմ, որ «և-և»-ի քաղաքականությունը կնպաստի նրան, որ Հայաստանը ունենա քիչ թե շատ տնտեսական վերելք, աճ, իսկ մնացածը ժամանակը ցույց կտա:
–Այսինքն՝ կարծում եք, որ օրինակ՝ իշխանության եկած եռյակը ժամանակի ընթացքում կսկսի «և-և»-ի քաղաքականությո՞ւն վարել: Կոնգրեսն ու ԲՀԿ-ն երբեք արևմտամետ հայացքներով աչքի չեն ընկել, Ասոցացման համաձայնագրին դեմ են եղել, հանրահավաքներում հայտարարում ու վստահեցնում են, որ Ռուսաստանի դեմ քայլ չեն անի, այսինքն՝ մինչ այժմ ակնհայտ ռուսաստանամետ քաղաքականություն են վարել:
–Քաղաքականությունը հնարավորությունների արվեստ է, քաղաքականության մեջ դոգմաներ չեն լինում, քաղաքականությունը դոգմատիկ չէ: Այստեղ խնդիրը դրված է, թե որտեղ և ոնց առավելագույնս կլինի երկրի, պետության և ժողովրդի շահը: Ոչ մի բան հավերժ չէ և սահմանափակված չէ, քաղաքականության մեջ ամեն ինչ հնարավոր է:
–Այսինքն՝ հնարավոր է, որ փոխե՞ն կարծիքը:
–Ամեն ինչ հնարավոր է, այնպես որ՝ հիմա այս իրավիճակում պետք է փաստի հետ հաշվի նստել: Հունվարի մեկից Եվրասիական տնտեսական միության անդամ ենք և պետք է փորձենք գոնե այս շրջանակներում Հայաստանի համար անվտանգության և տնտեսական աճի շահ գտնել:
–Ռուսաստանը մեր անվտանգության երաշխավո՞րն է՝ Ադրբեջանին պարբերաբար զինելով հանդերձ:
–Հաշվի առնելով Հայաստանի աշխարհաքաղաքական դիրքը և իր ունեցած կոնֆլիկտը՝ Ղարաբաղի խնդիրը, կարծում եմ՝ Ռուսաստանի կողմն է անվտանգությունը։ Բայց անվտանգության հարցով մենք կունենանք երաշխիքներ նաև Միացյալ Նահանգներից ու Եվրամիությունից: Այստեղ կարևոր է, թե ինչքան ճկուն ու դրսի համար ընդունելի քաղաքականություն կարող ենք վարել դրսի համար: Ես կարծում եմ, որ շատ հնարավոր է:
–Նույնիսկ այն դեպքում, երբ Հայաստանը համագործակցում է միջազգային մեկուսացման մեջ և պատժամիջոցների տակ գտնվող Ռուսաստանի՞ հետ:
–Գիտեք, վերջին մեկ շաբաթվա և 10 օրվա գործընթացները ինձ մոտ տպավորություն են թողնում, որ Արևմուտքը Հայաստանից ձեռք չի քաշի:Նրանք ըմբռնումով են մոտենում Հայաստանի որոշմանը, և ես հնարավորություն եմ տեսնում Արևմուտքի հետ բոլորովին նոր մոտեցումներով համագործակցելու համար: Ես համոզված եմ, որ դա հնարավոր է:
–Պարոն Հովհաննիսյան, Դուք եռյակի հե՞տ եք ցանկանում համագործակցել, թե՞ կոնկրետ «Բարգավաճ Հայաստանի» համար եք միանում այդ նախաձեռնությանը:
–Մեր կուսակցության հայտարարության մեջ նշված է, որ մենք չենք միացել, մենք աջակցում ենք համաժողովրդական շարժմանը, բայց համագործակցությունը կոնկրետ տեսնում ենք «Բարգավաճ Հայաստան» կուսակցության հետ:Մենք սերտ համագործակցություն տեսնում ենք ԲՀԿ-ի հետ:
–Ինչո՞ւ, որովհետև այդ կուսակցությունը ռեսո՞ւրս ունի:ԲՀԿ-ն նույնիսկ ընդդիմություն չէ, արմատական ընդդիմադիր դիրքերից «Ժառանգությունն» ու Կոնգրեսն են մշտապես հանդես եկել:
–Ամեն ինչ իր ժամանակին կլինի: Ես կարծում եմ, որ ԲՀԿ-ն այսօր շարժման մեջ դոմինանտ է, և ես ընդունում եմ ԲՀԿ-ի տեսակետը իշխանափոխություն իրականացնելու հարցում:Դա ընդունելի է մեր բոլորի համար: Մենք ԲՀԿ-ի հետ համագործակցությունը շատ արդիական ենք համարում: Ես գտնում եմ, որ շարժման շուրջ պետք է ավելի լայն կոնսոլիդացիա լինի: Եթե, իհարկե, մնացած ուժերն էլ ցանկանում են, որ երկրում նոր ժողովրդավար իշխանություններ ձևավորվեն:
–Օրինակ՝ ո՞ր տեսակետն եք ընդունելի համարում՝ որ հանրահավաքներ չանեն ու գրասենյակնե՞ր բացեն:
–Ես կարծում եմ, որ մեծ ճակատամարտերից առաջ բավականին լուրջ շտաբային աշխատանք պետք է տանել:Եվ հաղթում են այն ուժերը, որ այդ աշխատանքը տանում են: Ես կարծում եմ, որ ԲՀԿ-ն հենց այդ աշխատանքն է տանում: Ըստ իս՝ հանրահավաքների մասսայական միջոցառումների ժամանակը դեռ կգա, շատ չի ուշանա:
–Իսկ Դուք նո՞ր եք հասկացել, որ ԲՀԿ-ն է այդ ուժը, որ կարող է իշխանափոխություն անել: Այդ կուսակցության առաջնորդի թիկնապահներն, ըստ «Փաստահավաք խմբի» զեկույցի, զենք են բաժանել Մարտի մեկին:Մասնավոր զրույցներից կան տեղեկություններ, որ դուք էլ այլ կարծիք ունեիք նախկինում Ծառուկյանի մասին:
–Եթե հարցը կոնկրետ Ծառուկյանի մասին է, ապա ես նրան ճանաչում եմ մոտ 30 տարի, շատ երկար ժամանակ է ճանաչում ենք, մենք շատ մտերիմ ենք եղել: Ոչ մի իրավիճակում ես նրա մասին այլ կարծիքի չեմ եղել: Իսկ ինչո՞ւ հիմա որոշեցինք, որովհետև երբ ԲՀԿ-ն ու անձամբ Ծառուկյանը հայտարարեցին արտախորհրդարանական քաղաքական կուսակցությունների կոնսոլիդացիա, մենք այդ ժամանակ հնարավորություն ունեցանք միանալ շարժմանն ու պայքարին:
–Եվ բացարձակ չխոչընդոտեց Մարտի մեկի հանգամանքը, «Փաստահավաք խմբի» զեկույցը:
-Անձամբ ինձ և մեր կուսակցությանը դա չի խոչընդոտում: Ես գտնում եմ, որ Մարտի մեկի հետ կապված իրական լուծում ու պատկեր դեռ կլինի, իրական փաստերը փակ են մնացել: Կգա ժամանակ, և ամեն ինչ կբացվի, ու բոլոր գործիչները, ովքեր դերակատարություն են ունեցել՝ հասարակության մոտ ջրի երես դուրս կգան, ու պարզ կդառնա: Ես դրանում համոզված եմ:
Լուսանկարը՝ Photolure-ի