ՀՀ ԱԺ Հանրապետական խմբակցության պատգամավոր Արփինե Հովհաննիսյանն օրինագիծ է ներկայացրել ԱԺ-ին, ըստ որի՝ բանկերին արգելվում է սպառողական վարկերի դեպքում ընթացքում բարձրացնել տոկոսադրույքները:
Մեզ հետ զրույցում Արփինե Հովհաննիսյանը նշեց, որ վերջին օրերին հարցադրումներ են եղել, որ այս երկու օրվա խուճապի ժամանակ քաղաքացիները բանկերից ստացել են տոկոսադրույքների բարձրացման հետ կապված ծանուցումներ: «Ահա այստեղ է, որ այս նախագիծը որոշակիորեն իրավիճակ կշտկի, որովհետև այն անդրադառնում է սպառողական և հիփոթեքային վարկերի ժամանակ տոկոսադրույքների բարձրացման ընթացակարգին և նաև քաղաքացիների իրազեկմանը: Այսինքն՝ մենք լրացուցիչ ակտիվ պարտավորություն ենք դնում բանկի վրա, որ նա քաղաքացուն ծանուցի, թե ինչ տոկոսադրույքով է վարկը տալիս, և բացատրի, թե որ գործոնների դեպքում դա կարող է փոփոխվել: Որովհետև հայտնի է, որ քաղաքացիները ստորագրելուց առաջ նույնիսկ չեն էլ կարդում, թե ինչպիսի պայմանագիր են իրենց առաջարկում»:
Պատգամավորը նշեց, որ առաջարկվող օրինագծով՝ եթե սպառողական վարկերը տրամադրված են հաստատուն տոկոսադրույքներով, որևէ պարագայում հնարավոր չէ տոկոսադրույքը բարձրացնել մարման ժամկետի ընթացքում: «Հիփոթեքային վարկերի դեպքում ևս ունենք կարգավորում հաստատուն և լողացող տոկոսադրույքների դեպքում: Հաստատունի դեպքում, նկատի ունենալով այն հանգամանքը, որ հիփոթեքային վարկավորումը երկարաժամկետ է, այստեղ կանխատեսել շատ էլ հնարավոր չէ, ուստի ֆորսմաժորային իրավիճակում, ինչպիսին ֆինանսական շուկայում ցնցումներն են, հնարավորություն ենք տալիս քաղաքացուն ոչ թե միակողմանի ծանուցել և բարձրացնել տոկոսադրույքը, այլև կնքել լրացուցիչ պայմանավորվածություն»,- ասաց նա:
Արփինե Հովհաննիսյանը նկատեց, որ մինչ օրս վարկային պայմանագրում եղել են դրույթներ, որոնք հնարավորություն են տալիս բանկին միակողմանիորեն ծանուցելով՝ բարձրացնել տոկոսադրույքը: «Հիմա արգելք ենք դնում՝ պայմանագրով միակողմանիորեն չնախատեսել կետեր, որոնք թույլ կտան բարձրացնել տոկոսադրույքը: Այլ կերպ ասած՝ քաղաքացուն մասնակից դարձնել իր վարկի տոկոսադրույքի որոշման խնդրին, որպեսզի քաղաքացին հնարավորություն ունենա որոշելու:
Ես կարծում եմ՝ մի քանի օրվա ֆինանսական ցնցումները առիթ չեն, որպեսզի հատկապես սպառողական և հիփոթեքային վարկերի դեպքում, որոնք քաղաքացու սոցիալական վիճակի հետ սերտորեն առնչվում են, լրացուցիչ բեռ դրվի նրա վրա: Դա արդարացի չէ:
Բանկը նույնպես ռիսկ է կրում և պիտի իմանա, որ միշտ չէ, որ շահույթով է աշխատելու, որ հնարավոր են նաև այնպիսի իրավիճակներ, երբ իրենց հաշվարկած շահույթից շեղումներ լինեն: Մյուս կողմից, եթե ֆինանսական ցնցումները շարունակական բնույթ կրեն, բանկերն իրենք կարող են կանգնել կոլապսի առջև, իսկ նրանց կայունությունը ևս կարևոր է»,- ընդգծեց պատգամավորը:
Ավելին՝ տեսանյութում։