ԼՂՀ պաշտպանության նախարար, Պաշտպանության բանակի հրամանատար, գեներալ-լեյտենանտ Մովսես Հակոբյանը, որն այսօր ներկա էր «Բանակը մեր տունն է» խորագրով միջոցառմանը, «Առաջին լրատվական»-ի հետ զրույցում, նշեց, որ նման միջոցառումները նպատակ ունեն հայ ընտանիքին ու հայկական բանակի զինվորին մեծարել, մեծարել այն ծնողներին, ովքեր բանակին պատրաստված զինվոր են տվել: Մեր հարցին՝ առաջին գիծ 19-ամյա երիտասարդներին ուղարկելն արդյոք ճի՞շտ է, ՊԲ հրամանատարը պատասխանեց, որ զորակոչվելուց հետո զինվորները վեց ամիս նախապատրաստական աշխատանք են անցնում, որից հետո նոր միայն մեկնում են առաջին գիծ ծառայության: «19 տարեկանը այն տարիքն է, երբ խենթանալը հեշտ է լինում, իսկ հաղթանակները կերտում են խենթերը, այնպես որ շատ լավ տարիք է»,- ասաց նա:
Մեր դիտարկմանը ի պատասխան, թե օգոստոսյան դեպքերից հետո այսօր իրավիճակն աննախադեպ է, քանի որ հրադադարի խախտումները շատ են, Մովսես Հակոբյանն ասաց. «Եթե համեմատենք նախորդ տարիների հետ, իհարկե՝ ոչ: Եվ տարեցտարի մեր առաջին գծի լարվածությունը բավական սրանում է: Դա կապված է միայն հակառակորդի պահվածքի հետ»,- հավելեց նա:
Անդրադառնալով ՀԱՊԿ շրջանակներում առաջիկայում կայանալիք հանդիպմանը և հարցադրմանը, թե այդ օրերին իրավիճակը սահմանին հնարավո՞ր է՝ լարված լինի, Մովսես Հակոբյանը նշեց, որ մենք միշտ խենթեր ունենալու ենք, և ցանկացած հանդիպման ժամանակ՝ կապված ԼՂՀ հիմնախնդրի հետ, Ադրբեջանը փորձում է լարել իրավիճակն առաջին գծում:
«Մենք այս պահին ևս սպասում ենք այդպիսի լարվածության»,- ասաց նա:
Մովսես Հակոբյանից հետաքրքրվեցինք՝ արդյոք ուղղաթիռի խոցումից հետո մենք պատասխան տվեցի՞նք, և դեռ պատասխան ունե՞նք տալու: «Մենք միշտ ենք պատասխանում»,- ասաց նա:
«Չեմ կարծում, որ պատերազմ կլինի: Ադրբեջանը որոշել է այս կերպ պատերազմ վարել Արցախի բանակի հետ, բայց մենք ականատես ենք լինում, որ որևէ հաջողություն չի ունենում»,- նշեց նա՝ հավելելով, որ Ադրբեջանում պիտի սթափվեն և իրականությունը ճիշտ գնահատեն:
Ավելին՝ տեսանյութում: