Կոտայքի մարզի ընդհանուր իրավասության դատարանում Յուրի Բաղդասարյանի նախագահությամբ սկսվում է Տիգրան և Վարդան Երանոսյանների գործի դատական քննությունը:
Հեշտ չի լինելու այս գործով նախագահողի ու մեղադրողի գործը, որովհետև ամբաստանյալի աթոռին նստելու են երկվորյակ եղբայրներ:
Նրանց մեղսագրվող արարքն էլ կապված է հենց այդ հանգամանքի հետ:
Ըստ մեղադրանքի՝ 49-ամյա Տիգրան Երանոսյանը գտնվել է «Սևան» ՔԿՀ-ում: Նա պատիժ է կրել Երևանի Արաբկիր և Քանաքեռ-Զեյթուն վարչական շրջանների ընդհանուր իրավասության դատարանի՝ 2012 թվականի ապրիլի 10-ին դատավճռով:
2014 թվականի նոյեմբերին Ռուսաստանի Դաշնությունում նշանակված էր Տիգրան Երանոսյանի դստեր պսակադրության արարողությունը:
Ցանկանալով մասնակցել դստեր հարսանիքին՝ Տիգրանը որոշել է երկվորյակ եղբոր՝ իրենից արտաքնապես չտարբերվող Վարդան Երանոսյանի օժանդակությամբ փախուստ կատարել ազատազրկման վայրից:
2014 թվականի հոկտեմբերի 7-ին, ժամը 14-ի սահմաններում «Սևան» ՔԿՀ կարճատև տեսակցության եկած Վարդանի հետ, տեսակցությունների համա նախատեսված սենյակի մոտ գտնվող զուգարանում Տիգրանը փոխվել է հագուստը:
Ապա տեսակցության եկած մյուս եղբոր՝ Արմեն Երանոսյանի հետ Վարդանի փոխարեն հսկիչ-անցագրային կետում վերցրել է նրա անձնագիրը, դուրս է եկել քրեակատարողական հիմնարկի վարչական տարածք:
Իսկ զգեստափոխված Վարդանը այդ ժամանակ Տիգրանի փոխարեն գնացել է դատապարտյալների բնակելի գոտի:
Սակայն «բլեֆը» չի ստացվել:
Տիգրան Երանոսյանը չի հասցրել հատել ՔԿՀ-ի մուտքի պահակետը և դուրս գալ կալանավայրի տարածքից, նա բռնվել է աշխատակիցների կողմից:
Տիգրան Երանոսյանը մեղադրվում է կալանավայրից փախուստի փորձ կատարելու, իսկ Վարդան Երանոսյանը՝ եղբոր փախուստի փորձին օժանդակելու համար՝ համապատասխանաբար՝ ՀՀ քրեական օրենսգրքի 34-355 հոդվածի 1-ին մասով և 38-34-355 հոդվածի 1-ին մասով:
Տիգրան Երանոսյանը շարունակում է կալանքի տակ մնալ, իսկ նրա ամբաստանյալ «նմանակի»՝ Վարդանի խափանման միջոցը ստորագրությունն է չհեռանալու մասին: Այսինքն՝ Վարդանն էլ եղբոր դստեր հարսանիքին գնալ չի կարողացել…