Հունվարի մեկից Հայաստանը կդառնա Եվրասիական տնտեսական միության անդամ: Տարատեսակ «դժգոհություններից» հետո Հայաստանի անդամակցումը վավերացրեցին նաև ԵՏՄ հիմնադիր անդամ երկրներ Բելառուսն ու Ղազախստանը:
Թեպետ վերջին պահին էլ Բելառուսի փոխարտգործնախարար Ալեքսանդր Միխնևիչը հայտարարեց, որ Եվրասիական միությանը Հայաստանի անդամակցության մասին պայմանագրին կցված է նոտա, որ Լեռնային Ղարաբաղը Հայաստանի Հանրապետության մաս չի կազմում: Բելառուսը մասնավորապես մտահոգություն էր հայտնել այն մասին, որ Եվրասիական տնտեսական միության մաս կարող են կազմել Հայաստանի կազմի մեջ չմտնող տարածքները: Հայկական կողմն էլ ըմբռնումով է ընդունել այդ պահանջը և բանավոր հայտարարություններ է արել:
«Առաջին լրատվական»-ի հետ զրույցում ԼՂՀ ԱԺ անկախ պատգամավոր Վահան Բադասյանը նշեց, թե առաջին անգամ չէ, որ Ադրբեջանի դաշնակից երկրներ Բելառուսն ու Ղազախստանը նման կերպ են արտահայտվում Հայաստանի և Լեռնային Ղարաբաղի մասին, և սխալն այստեղ ՀՀ իշխանություններն ու այն շրջանակներն են, որոնք վավերացրեցին Հայաստանի անդամակցության փաստաթուղթը:
«Սա չարիք է Հայաստանի և հայ ժողովրդի համար, իսկ Հայաստանի իշխանությունները բարբաջում են՝ իբրև թե սա անվտանգության համար է: Այն հայ պաշտոնյան, որ խոսում է ԵՏՄ-ի լավ լինելու մասին՝ նա կամ մոլորված է, կամ Ռուսաստանի վասալն է»,- ասաց Բադասյանը:
Նրա խոսքերով՝ պետք է կույր լինել չհասկանալու համար, թե ինչ արհավիրքներ կբերի Հայաստանի համար միայն անդամակցությունը. «Իսկ եթե Աստված չանի, և այն ուժի մեջ մտնի ու սկսի գործել, ապա մեր ժողովուրդը կտեսնի մյուս արհավիրքները: Այս ամենը պատճառաբանում են անվտանգության երաշխիքով, ի՞նչ է նշանակում՝ եթե չմտնենք ԵՏՄ, Ռուսաստանը պետք է պատերա՞զմ սկսի մեր հետ, թե՞ պետք է Ադրբեջանին ու Թուրքիային քսի տա, որ նրանք հարձակվեն՝ ոչ իհարկե, դա թյուրիմացություն է: Ռուսաստանը չէ, որ այսօր հավասարակշռում է աշխարհը: Ռուսաստանը այսօր թույլ և կործանվող, աննորմալ կայսրություն է, որ շուտով պետք է փլուզվի, Հայաստանն էլ նրան է անդամակցել, որ խորտակվի՞, դա թյուրիմացություն է»:
Բադասյանն ընդգծեց, որ նույնիսկ օլիգարխները, որ կողմ քվեարկեցին խորհրդարանում՝ շուտով իրենց մաշկի վրա կզգան դրա արհավիրքները. «Նրանք իրենց մաշկի վրա են զգալու այդ ամենը: Ես ցավում եմ, որ Հայաստանում չկա գոնե մի էլիտա՝ բացառությամբ մի քանի անհատներից, որ ազդարարեր դրա վտանգների մասին, բոլորս ենք տեսնում այդ արհավիրքները: Արդեն սկսել ենք տեսնել դոլարի գահավիժում, ապրանքի թանկացում, շուտով այլ բաներ կտեսնենք և կհամոզվենք»:
Մեր զրուցակիցը հավելեց նաև՝ Ռուսաստանը մեծ ցանկություն ունի, որ Ադրբեջանն էլ դառնա Եվրասիական տնտեսական միության անդամ, իսկ այդ միության անդամ երկրներն էլ՝ Բելառուսն ու Ղազախստանը, ամեն ինչ կանեն դրան հասնելու համար. «Մեզ՝ հայ ժողովրդիս ավելի ծանր բեռ է մնում: Մարդիկ այսօր ազատությունը զոհաբերում են հանցավոր հանգստի համար. մեր ժողովրդի մեծ մասը մոլորության մեջ է: Ես ցավով եմ ասում, բայց մենք արյուն ենք լացելու նորից, մեր զավակները վտանգի տակ են: Աստված մեզ հեռու պահի բոլոր արհավիրքներից»,- եզրափակեց Վահան Բադասյանը: