Մի շարք բարեհաջող հակաահաբեկչական գործողությունների արդյունքում աֆղանական անվտանգության ուժերը երկու օրում չեզոքացրել են «Թալիբան» շարժման ավելի քան 200 գրոհայինների: Ինչպես հայտնել են երկրի պաշտպանության նախարարությունում՝ ծայրահեղականները սպանել էին 6 աֆղան զինծառայողների և երեք խաղաղ բնակիչների, ավելի քան 20 զինվորներ վիրավորվել էին՝ գրում է TASS-ը:
Ոստիկանության տվյալներով՝ առավել զանգվածային գործողություններ են անցկացվել երկրի արևելյան Կունար գավառում: Իրավապահ մարմիններին հաջողվել է բացահայտել և ոչնչացնել թալիբների մի քանի խոշոր խմբավորումների՝ ընդհանուր առմամբ 62 մարդ: Բանակը նաև ազատել է զգալի թվով աշխարհազորայինների, ովքեր պաշարված էին և մեկ շաբաթից ավելի անհավասար մարտեր էին մղում գրոհայինների դեմ: «Թալիբան»-ի զինված ջոկատների մի մասը նահանջել է Պակիստանի տարածք:
«Մաքրվել» են նաև Գիլմենդ, Պակտիա, Հոսթ, Ուրուզգան, Բալհ, Ջաուզջան և Սարի Պուլ գավառները: Գործողություններին մասնակցել են ՆԳՆ-ի, բանակի և Ազգային անվտանգության աշխատակիցներ: Ուժայիններն իրենց վերահսկողության տակ են վերցրել զենքերի պահեստներ, ինչպես նաև վնասազերծել 26 ինքնաշեն ականներ, որոնք տեղադրված են եղել Աֆղանստանի գլխավոր մայրուղիներում: