Այսօր` դեկտեմբերի 20-ին «Սպորտը` հանուն հավասար հնարավորությունների» խորագրի ներքո Երևանի Տիգրան Պետրոսյանի անվան շախմատի տանը ներառական և միջնակարգ կրթություն ստացող շուրջ 25 երեխա շախմատ խաղաց Հայաստանի հավաքականի առաջատար Լևոն Արոնյանի հետ:
Խաղի մեկնարկից առաջ Արոնյանը նշել է բոլոր երեխաների մարզաձևով զբաղվելու հնարավորության կարևորությունը:
«Ոչ բոլորն են բախտավոր և շատ առողջ: Մենք հաշմանդամություն ունեցող երեխաների մասին մշտապես պետք է հոգ տանենք: Բոլորին պետք է հնարավորություն տրվի զբաղվելու սիրած մարզաձևով: Հաճույքով եմ խաղում երեխաների հետ, քանի որ իրենք միշտ նոր մտքեր ունեն, միշտ փորձում են ամենալավ խաղը ցույց տալ, չեն վախենում քայլ անելուց: Երեխաների մեջ կա յուրահատուկ աշխուժություն, խաղի ընթացքում իմպրովիզները շատ են:
Շախմատ խաղացող երեխաները տաղանդավոր են: Ես փորձում եմ ամեն տարի իմ կողմից մի փոքր աջակցություն, ուշադրություն ցուցաբերել երեխաներին, մասնավորապես հաշմանդամություն ունեցողներին: Այս երեխաների հետ խաղալիս անգամ մի փոքր հուզվում եմ»,- ասաց Լևոն Արոնյանը:
Լուսանկարը՝ MEDIAMAX-ի
