«Պուտինը մոռացել էր հայաստանյան բազաների մասին, ի դեպ՝ ոչ միայն հայաստանյան»,- այս մասին այսօր «Առաջին լրատվական»-ի հետ զրույցում ասաց Պետդումայի նախկին պատգամավոր, ՌԴ քաղաքական հետազոտությունների կենտրոնի ղեկավար, ՌԴ հանրային պալատի ներկայացուցիչ, քաղաքագետ-տնտեսագետ Սերգեյ Մարկովն՝ անդրադառնալով երեկ ՌԴ նախագահ Վլադիմիր Պուտինի դիտարկմանը, թե արտասահմանում ՌԴ-ն ընդամենը երկու ռազմական բազա ունի՝ Ղրղզստանում և Տաջիկստանում:
Մարկովն ասաց՝ նկատել է, որ Պուտինը բաց է թողել Ռուսաստանի արտասահմանում առկա այլ ռազմական բազաներն ու բլոկները: Նրա համոզմամբ՝ ՌԴ նախագահը պարզապես մոռացել է, և դրանում այլ պատճառներ պետք չէ փնտրել: Մարկովի խոսքով՝ դրանում չպետք է այլ միտում տեսնել, առավել ևս այն, թե ՌԴ-ն Հայաստանին չի համարում արտասահման: Նա նաև հիշեցրեց, որ Պուտինը մոռացել է ոչ միայն հայաստանում տեղակայված իր ռազմաբազաների մասին, այլև Բելառուսում ռազմական բլոկների առկայության մասին:
Ինչ վերաբերում է Ռուսաստան-Թուրքիա համագործակցության օրակարգին, ապա Մարկովն ասաց, որ ՌԴ-ն ցանկանում է Թուրքիայի հետ լիարժեք համագործակցություն կառուցել, որը Ռուսաստանն օգտագործում է որպես այլընտրանք ԵՄ-ի հետ կործանվող հարաբերություններին: «Ուստի կարևոր է, որ Թուրքիան չի միացել պատժամիջոցներին, ավելին՝ օգտագործում է պատժամիջոցների պատերազմը՝ ԵՄ-ին այդ համագործակցությամբ փոխարինելու համար. դա Ռուսաստանի համար շատ կարևոր է այս փուլում»,- ասաց Մարկովը՝ հավելելով, որ ՌԴ-ն մեծ հույսեր և պրոյեկտներ է կապում Թուրքիայի հետ, իսկ դրանք դեռ մշակման փուլում են:
Հիշեցնենք, որ Ռուսաստանի Դաշնության նախագահ Պուտինը դեկտեմբերի 18-ի մամուլի ասուլիսի ընթացքում հայտարարություն էր արել Ռուսաստանի սահմաններից դուրս ռուսական ռազմակայանների առկայության մասին և ասել, թե այդպիսիք Ռուսաստանն ունի ընդամենը երկու երկրում՝ Ղրղզստանում և Տաջիկստանում, ինչը բնական հարց է առաջացնում այն մասին, թե ի՞նչ է դիտարկում Վլադիմիր Պուտինը Հայաստանում տեղակայված բազաները կամ դրանք համարում է ռազմաբազաներ ՀՀ տարածքում, թե՞ Ռուսաստանի: Նա նաև հայտարարել էր, որ Ռուսաստանն ու Թուրքիան ընդհանուր շահեր ունեն բազմաթիվ հարցերում:
Թուրքական «Ջիհան» գործակալության թղթակցի հարցին Պուտինը պատասխանել է, որ, ճիշտ է, Ռուսաստանի ու Թուրքիայի հարաբերություններում դրամատիկ, ողբերգական դրվագներ են եղել, սակայն լավ ժամանակներ էլ են եղել, ինչպես Աթաթուրքի իշխանության տարիներին:
Նա նշել է, որ Ռուսաստանն ու Թուրքիան բազմաթիվ համընկնող տարածաշրջանային շահեր ունեն: «Ավելին, առանց Թուրքիայի ակտիվ մասնակցության՝ տարածաշրջանային այդ խնդիրները չեն կարող լուծվել, այդ պատճառով շատ ենք շահագրգռված հարաբերությունների զարգացմամբ»,- ասել էր Պուտինը:
