Գրասենյակային սարքավորումների վաճառքի՝ ԱՄՆ-ի խոշորագույն Staples ցանցը հայտնել է, որ մի շարք ցանցահենային հարձակումների է ենթարկվել: Այս մասին հայտնում է Ria Novosti-ն՝ հղում անելով ընկերության ուրբաթ օրը հրապարակած պաշտոնական հայտարարությանը:
Հայտարարության մեջ ասվում է, որ հանցագործներին հաջողվել է ավելի քան 1400 խանութներից 115-ի վճարային համակարգերում վնասակար ծրագրային ապահովում ներմուծել, որը, ենթադրաբար, նրանց հասանելիություն է ապահովել մոտ 1,2 մլն գնորդի բանկային քարտի տվյալներին: Հարձակումներն իրականացվել են 2014թ. հուլիսից սեպտեմբեր ժամանակահատվածում, սակայն հատկապես ով է դրանց համար պատասխանատու՝ դեռ հայտնի չէ:
Ընկերության հայտարարությամբ՝ ներկայումս վնասակար ծրագիրը ջնջվել է համակարգչային համակարգից և այլևս վտանգավոր չէ հաճախորդների համար:
