ԱՄՆ իշխանությունները դատարանին խնդրել են 16-18 մլրդ դոլարով տուգանել բրիտանական British Petrolium (BP) նավթային ընկերությանը 2010թ. Մեքսիկական ծոցում տեղի ունեցած վթարի համար: Համապատասխան միջնորդությունն ուղարկվել է Նոր Օռլեանի դաշնային դատարան՝ հայտնում է Bloomberg-ը:
Փաստաթղթում նշվում է, որ BP-ի անգործությունը հանգեցրել է ԱՄՆ-ի պատմության մեջ խոշորագույն նավթի արտահոսքին, ինչի պատճառով ընկերությունը պետք է կրի ամերիկյան օրենքներով սահմանված առավելագույն պատիժ: Միաժամանակ, իշխանությունները նաև խնդրում են 1 մլրդ դոլարով տուգանել վթարային հորատանցքի համասեփականատեր Anadarko ընկերությանը, որին պատկանել է նախագծի 25%-ը:
Deepwater Horizon հարթակի վթարը տեղի է ունեցել 2010թ. ապրիլի 20-ին: Վթարի հետևանքով 11 մարդ է զոհվել, ծով է լցվել հարյուր հազարավոր տոննա նավթ: Պատահարի հետևանքով կրած խոշոր վնասների պատճառով BP-ն իր ակտիվները սկսել է վաճառել ամբողջ աշխարհում:
Ընդհանուր առմամբ BP-ն արդեն վճարել է 42 մլրդ դոլար: Այդ գումարը ներառում է վնասի փոխհատուցումները, պետական տուգանքները, ջրային տարածքի մաքրումը: