ԱՄՆ նախագահ Բարաք Օբաման դեկտեմբերի 19-ի իր ամփոփիչ մամլո ասուլիսի ժամանակ հայտարարել է, որ աֆրոամերիկացիների, ինչպես նաև ընդհանրապես ամերիկացի բնակչության վիճակը բարելավվել է՝ 2009թ.-ին իր պաշտոնավարման առաջին ժամկետի համեմատ: Այս մասին հայտնում է CNN-ը:
Օբաման նշել է, որ աֆրոամերիկացիները, ինչպես նաև ԱՄՆ բոլոր բնակիչները սկսել են ավելի լավ ապրել այն ժամանակից ի վեր, ինչ ինքը դարձել է նախագահ: Միաժամանակ սպիտակամորթ ու սևամորթ բնակչության եկամուտների միջև տարբերությունը դեռ պահպանվում է, ուստի պետությունը պետք է «շատ աշխատի այդ ճակատում»:
Օբաման նաև խոստացել է, որ կանցկացվեն «կոնկրետ, գործնական իրավապաշտպան բարեփոխումներ»՝ կապված ոստիկանների կողմից անզեն աֆրոամերիկացիներին սպանելու դեպքերի հետ:
«Երբեմն մեր ինստիտուտները աշխատում են ոչ այնքան լավ, որքան պետք է»,- խոստովանել է ԱՄՆ նախագահը՝ ընդգծելով, որ վերջին շրջանում այդպիսի ինստիտուտներից է ոստիկանությունը: