Արդեն մեկ տարի է՝ «Ալիշան» ՍՊԸ-ն, որ հայտնի է իր պահածոների տեսականիով (շուրջ 80 տեսակ), շարունակում է «ՀայՌուսգազարդի» կամայականությունների զոհ դառնալ:
Նոր կառավարությունը խոստումներ տվեց, որոնք այդպես էլ իրականություն չդարձան, միայն ընկերության գազը կարողացան միացնել, սակայն այդպես էլ չկարողացան «ՀայՌուսգազարդին» ստիպել մուծել պարտքերը:
Ինչպես ավելի վաղ տեղեկացրել էինք, «Ալիշան» ընկերությունը «ՀայՌուսգազարդի»՝ մոտ 160 հազար խորանարդ մետր գազի գնի ավել հաշվարկն ապացուցել էր, ինչը մոտավորապես 15-20 միլիոն է կազմում: Գործարանի սեփականատեր Սերժիկ Մոսեսյանը շարունակում է սպասել:
«Պետությունը պետք է «Գազպրոմին» վնասների փոխհատուցում պարտադրեր, ոչ թե ընկնել դատարանի դռները, փող ծախսել: Մի քանի տարի դատական գործ կլինի. երեք տարի տևելու է, իսկ մենք արդյոք կարո՞ղ ենք «Գազպրոմին» հաղթել այս երկրում, չենք կարող հաղթել: Մենք նրան որևէ գումար պարտք չենք»,- վստահորեն նշեց Սերժիկ Մոսեսյանը:
«Ալիշան» ընկերության սեփականատերը նշեց, որ այս օրերին թեև բոլոր ապրանքների նկատմամբ գնաճ իրականացվեց, սակայն իր ընկերությունը զերծ մնաց դրանից:
«Ամեն բան թողել եմ նախորդ տարվա գներով, ոչնչի ձեռք չենք տվել: Մենք նախկինում բանակի համար էինք նաև պահածոներ արտադրում, հիմա չենք գործում: Այս սեզոնին բան չունենք արտադրելու»,- հավելեց Սերժիկ Մոսեսյանը:
Սուպերմարկետներում թանկացե՞լ է «Ալիշանը», տնօրինությունը հսկե՞լ է այս օրերի գնաճը: Սերժիկ Մոսեսյանը նշեց, որ թեև չի հետևել, բայց այսօրվանից արդեն կկարգավորվի, քանի որ դոլարի գինը նվազել է:
Գործարարների համար արդյոք բարենպա՞ստ պայմաններ են ներդրումներ անելու համար, թե՞ հիմա ավելի վտանգավոր է: Այս հարցին ի պատասխան՝ Սերժ Մոսեսյանը մեկնաբանեց. «Արտադրողներին ձեռնտու է դոլարի գնի բարձրացումը, այսինքն՝ արտահանելուց կկարողնանք մրցունակ ներգործել: Մեզ մոտ դոլարի գինն արհեստական ցածր էր: Իհարկե, շատ չբարձրանա, այլ նորմալ, տեղը տեղին լինի, ասենք՝ 450-500-ի սահմաններում նորմալ է: Իմ կարծիքով՝ արտադրողներին դա ձեռնտու կլինի, արտադրողների շահերից է բխում դոլարի արժևորումը»,- հավելեց նա:
ԵՏՄ անդամակցությունից հետո, գործարարի կարծիքով, եթե ամեն ինչ նորմալ ընթանա, որոշ արտադրողների, մանավանդ իրենց գործարանի համար դուռ կբացվի, և դա լավ է. «Մեծ շուկա է, մեր ապրանքը արդեն կճանաչվի Ռուսաստանում: Մեր ապրանքի որակը եվրոպական երկրների արտադրանքի համեմատ բարձր է, քանի որ մեր բանջարեղենի, մրգերի համն ու հոտը աշխարհում չկա: Եթե ամեն ինչ նոմալ լինի, եթե կայունանա Ռուսաստանի վիճակը, ամեն ինչ պետք է լավ լինի, որ կարողանանք ածխատել: Հիմա ես ուզում եմ ապրանք ուղարկել Ռուսաստան, ամեն մեքենայի մեջ 3000-4000 դոլար տուժում եմ… Ինչու: Մինչև գնում-հասնում է տեղ, այդքան կորուստ եմ ունենում: Այն ժամանակ մեր պայմանագրերը ռուբլով էին, իսկ հիմա ռուբլին շատ մեծ վնասներ է կրում»:
«Ալիշան» գործարանի սեփականատերը վստահորեն նշեց, որ գործարանի համար Հայաստանի՝ ԵՏՄ անդամակցությունից հետո պետք է լավ լինի:
Այս տարի ընկերությունը, նախորդ տարվա համեմատությամբ, 15-20 պահածոյի տեսակ քիչ է արտադրել՝ պայմանավորված նաև լոլիկի ոչ բարձր որակով, իսկ «Ալիշան» ընկերությունը մեծ մասամբ լոլիկ է օգտագործում:
«Այս կառավարությունը պետք է կարողանա նորմալ օրենքներ մշակել, մարդիկ նորից գան, ներդրումներ անեն, չվախենան: Մտավախությունս այն է, որ Ռուսաստանում մեծահարուստներ կան, հսկայական գործարաններ կարող են գալ-դնել, մենք չկարողանանք մրցել: Այսինքն՝ մեծ փողատերեր կան այնտեղ, ամենանոր տեխնոլոգիաներով գործարաններ կներդնեն, և մրցակցությունը դժվարանա: Միակ մտավախությունս դա է»,- հավելեց գործարարը:
