«Ընդդեմ վերջին օրերի թանկացումների» նախաձեռնությունն այսօր կառավարությանը մի քանի պահանջ ներկայացրեց, որոնց չկատարման դեպքում մասնակիցները խոստացան «ավելի կոպիտ քայլերի դիմել»:
Նախաձեռնության անդամները կառավարությունից պահանջեցին հրատապ միջոցառումներ ձեռնարկել մինչև դեկտեմբերի 23-ը առաջին անհրաժեշտության ապրանքների ու ծառայությունների գները մինչճգնաժամային մակարդակի բերելու համար: Իջեցնել գազալցակայաններում գազի գինը, վերահաշվարկել քաղաքացիների դոլարային վարկերը, արգելել ՀՀ-ից դեպի ՌԴ դոլարի և ՌԴ-ից՝ դեպի ՀՀ ռուբլու սպեկույլատիվ ելքերն ու մուտքերը, ինչպես նաև իրականացնել շուկայի ազատականացում և վերացնել բոլոր տեսակի մենաշնորհները:
Նախաձեռնության անդամների այս կետերի հրապարակման պահին կառավարությունից դուրս եկավ ԱԺ ՀՀԿ-ական պատգամավոր, գործարար Սամվել Ալեքսանյանը, որին ակցիայի մասնակիցները ուղեկցեցին «ա-մո՛թ-ա-մո՛թ» վանկարկումներով:
«Այս օրերին տեղի ունեցավ արհեստական մի գործընթաց, որի ժամանակ խոշոր սուպերմարկետների սեփականատերերը շատ կարճ ժամանակահատվածում միլիոններ աշխատեցին, որից հետո դոլարի կուրսն էլ իջավ, և դրամը կայունացավ: Այս ամենը լավ կազմակերպված մի գործընթաց էր»,- «Առաջին լրատվական»-ի հետ զրույցում ասաց ակցիայի մասնակիցներից մեկը՝ հավելելով, որ վարչապետի՝ խանութներ շրջայցերը իրավիճակ չեն փոխում: Նրա շրջայցից հետո գները նորից վերականգնվում են: «Այլ մեխանիզմներ են հարկավոր, պատժիչ մեխանիզմներ»,- ասաց նա:
Բողոքի ակցիային ներկա ԱԻՄ կուսակցության նախագահ Պարույր Հայրիկյանն էլ կարծում է, որ այս ամենը ԵՏՄ-ին միանալու գործընթացի շարունակությունն է:
Ակցիայի մասնակիցները կառավարությանը 5 օր ժամանակ տվեցին՝ կատարելու իրենց պահանջները, որից հետո հավաքվելու են Ազատության հրապարակում և գնալու են, իրենց խոսքով, ավելի կոշտ քայլերի:
Առավել մանրամասն՝ տեսանյութում: