2004 թվականին ոստիկանության կողմից խոշտանգված ՀԺԿ նախկին անդամ «Գրիշա Վիրաբյանն ընդդեմ Երևանի ոստիկանապետ Աշոտ Կարապետյանի» գործը դեռևս գտնվում է նախաքննության փուլում:
Հիշեցնենք, որ քննչական մարմինը դեռ 2004 թվականին հրաժարվեց գործ հարուցել Վիրաբյանին խոշտանգելու մեղադրանքով՝ համարելով, որ ոստիկանական բաժանմունքում նրան ծեծի չեն ենթարկել: Աչք փակվեց անգամ այն հանգամանքի վրա, որ Վիրաբյանը օրեր շարունակ անցկացրել է հիվանդանոցում, դաժան ծեծի հետևանքով վիրահատվել:
Սակայն մարդու իրավունքների Եվրոպական դատարանը Վիրաբյանի օգտին որոշում կայացրեց, և Հայաստանի Հանրապետությունը ստիպված եղավ փոխհատուցել Վիրաբյանին: Դրանից հետո Գրիշա Վիրաբյանը նորից դիմեց Հայաստանի արդարադատությանը՝ մեղավորներին պատժելու ակնկալիքով:
Վիրաբյանն «Առաջին լրատվական»-ի հետ զրույցում ասաց, որ իր փաստաբանին կանչել են դատաբժշկական փորձաքննության եզրակացությանը ծանոթանալու։ «Բայց գործում ամեն ինչ կա, ու ամեն ինչ հաստատված է. չգիտեմ՝ ինչու են հիմա կանչում: Երկու անգամ զանգել եմ քննիչին, ասել է՝ պետք լինես, կասենք: Ես չգիտեմ՝ առայժմ կա՞ ինչ-որ մեկի դեմ գործ հարուցված, թե՞ ոչ, ոչ մի բան չեն ասում»,-ասաց Վիրաբյանը:
Մեր զրուցակցի խոսքերով՝ իրավական առումով այդ գործի մեջ ամեն ինչ պարզ է, միայն թե չեն կարողանում գործին քաղաքական լուծում տալ․ «Եվրադատարանը վճիռը կայացրել է, Հայաստանին տվել երեք ամիս ժամանակ բողոքարկելու այդ վճիռը, Հայաստանը չի բողոքարկել այդ վճիռը՝ ըստ էության համամիտ լինելով ՄԻԵԴ-ի վճռի հետ: Իրենք գիտեն՝ մեղավորն ով է, ու ինչ պետք է անեն, բայց քաղաքական հետևանքները չեն պատկերացնում, թե ինչ պետք է լինի: Դուք էլ գիտեք, որ գործում բարձրաստիճան պաշտոնյաներ են ներգրավված:
Գրիշա Վիրաբյանի փաստաբան Ալեքսանդր Սիրունյանն «Առաջին լրատվական»-ին փոխանցեց, որ նախաքննության ավարտի ժամկետը որոշում են քննիչն ու դատախազը, և դեռ ավարտվելու ժամկետի մասին տեղեկություն չունի․ «Տեղյակ եմ, որ փորձաքննությունը նշանակել են՝ կարգն այնպես է, որ մեզ պետք է որոշմանը ծանոթացնեն, պետք է մոտ օրերս գնամ ծանոթանամ»,- եզրափակեց նա: