Քարնեգի-Մելոնի համալսարանի մասնագետները պարզել են, որ մերձավոր մարդկանց հետ ֆիզիկական շփումը, մասնավորապես գրկախառնությունները բարելավում են օրգանիզմի հոգեբանական վիճակը և, որպես հետևանք, օգնում են պայքարել անբարենպաստ արտաքին ֆակտորների, օրինակ՝ վարակների դեմ, գրում է Gazeta.ru-ն:
Գիտնականների փորձերին 404 մեծահասակներ են մասնակցել: Փորձից առաջ նրանք հարցաթերթիկ են լրացրել, որը վերաբերել է կամավորների և նրանց մտերիմների հարաբերություններին, ինչպես նաև հարցեր են տրվել այն մասին, թե որքան հաճախ են նրանք գրկախառնվում:
Արդյունքները ցույց են տվել, որ մարդիկ, ովքեր հաճախ են գրկախառնվում հարազատների և ընկերների հետ, ավելի քիչ են վիրուսներով հիվանդանում: Եթե նույնիսկ նրանք հիվանդանում են, ապա հիվանդությունը թեթև է անցնում: Այս փաստի բացատրությունն այն է, որ գրկախառնությունները բարելավում են օրգանիզմի հոգեբանական վիճակը՝ դրանով իսկ ամրացնելով օրգանիզմը: Դրա շնորհիվ հիվանդությունների և վիրուսների դեմ պայքարելն ավելի հեշտ է դառնում: