25 տարի առաջ՝ 1989 թ. դեկտեմբերի 17-ին, Fox ալիքով առաջին անգամ թողարկվել է «Սիմփսոններ» հեռուստասերիալը, որն ամերիկյան կինեմատոգրաֆիայի պատմության մեջ ամենաերկարն է (ավելի քան 550 էպիզոդ), ինչպես նաև սերիալում ամենամեծ թվով աստղեր են ներգրավված, գրում է Time-ը:
«Սիմփսոնների» հեղինակ Մեթ Գրոունինգն անցած տարիներին հասցրել է ոչ միայն մուլտիմիլիոնատեր, այլև մեդիաոլորտում լեգենդար կերպար դառնալ: Նա խոստովանում է, որ նույնիսկ ամենաքաղցր երազներում չէր կարող պատկերացնել, որ այդ ընտանիքին նման հաջողություն է սպասվում:
Առաջին սերիան՝ Good night-ը, ցուցադրվել է «Թրեյսի Ուլմանի շոուին» 1987 թ. ապրիլի 19-ին: Լիրաժեք սերիաները սկսվել են թողարկվել 1989 թ. դեկտեմբերի 17-ին Fox հեռուստաալիքով: Շոուն ծաղրում է շատ կարծրատիպեր և կլիշեներ,մասնավորապես՝ միջինվիճակագրական ամերիկացու ապրելաոճը, համաշխարհային մշակույթի առանձնահակությունները, հայտնիներին և նույնիսկ հեռուստատեսությանը:
Այսօրվա դրությամբ, սերիալը ցուցադրվում է աշխարհի ավելի քան 100 երկրներում: Իր գոյության տարիներին սերիալը բազմաթիվ մրցանակներ է ստացել:
2000 թ. հունվարի 14-ին Հոլիվուդի Փառքի ճեմուղում բացվել է սերիալի աստղը: