Հայաստանի ԱԺ նախագահ Գալուստ Սահակյանը կարծում է, որ պատգամավոր Սեդրակ Սարոյանի ելույթը, որտեղ նա, ըստ էության, խոստովանում էր, որ Արամ Մանուկյանին ծեծի ենթարկելը իշխանությունների ձեռքի գործն էր, լավ ընդունվեց Ազգային ժողովում:
Նրա խոսքերով՝ ճիշտ չի լինի ասել, որ դա քաղաքական ուժի համոզմունքն է:
«Դա նրա անձնական կարծիքն ու մոտեցումն էր, մենք էլ ենք ասում՝ չի կարելի հայհոյել: Իմ տեսակետն այն է, որ խոսքն ավելի մեծ ազդեցություն է ունենում մարդու վրա, քան ցանկացած բռնություն: Մարդու համար կարող ես այնպիսի հանգամանքներ ստեղծել, որ նա այդ խոսքի զոհը դառնա: Բայց միաժամանակ պետք է տարբերակում մտցնել, որ հասարակության միջից ընդհանրապես բռնություն հասկացողությունը դուրս գա: Այդ երևույթը պիտի չլինի:
Մարդը տուն է գնում, հանկարծակի հարձակվում ու ծեծում են: Ինչ գործողություն էլ արած լինի, ինչպիսի թշնամիներ էլ ունենա, բոլոր դեպքերում, բռնությունը անասնական զգացում է: Ես էլ եմ ասում՝ եթե ինձ հայհոյեն, բնականաբար պատասխան եմ տալու, բայց համաչափ և շատ գրական լեզվով, որն ավելի զորեղ կլինի, քան ցանկացած հայհոյանք»,-ընդգծել է Գալուստ Սահակյանը:
