Այն, ինչ տեղի ունեցավ երեկ արտարժույթի շուկայում, ապա և մեր խանութներում, կարելի է բնութագրել մեկ բառով՝ շոկ:
Դեկտեմբերի սկզբի վերջին թռիչքից հետո փոքր-ինչ խաղաղված դոլարի կուրսը երեկ կատարեց հերթական թռիչքը, ինչի հետևանքով արդեն օրվա վերջին Երևանի խանութների մեծ մասը կա՛մ ժամանակավորապես փակվեցին, կա՛մ վաճառվող սննդամթերքի վրա սահմանեցին որոշակի սահմանափակումներ: Նման բան հետպատերազմական շրջանից ի վեր Հայաստանում չէր եղել:
Այն բանից հետո, երբ Ռուսաստանի ԿԲ-ն երեկ բարձրացրեց առանցքային տոկոսադրույքը մինչև 17 տոկոս, ռուսական ռուբլու ազատ անկումը գրանցեց նոր ռեկորդ՝ հատելով 80-ի սահմանագիծը, և այլևս կասկածից դուրս է, որ նույն ճակատագիրը սպասվում է նաև հայկական դրամին:
Ինչպե՞ս ենք մենք հաղթահարելու այս աննախադեպ ցնցումները, ի՞նչ ռեսուրսներ ունենք դրա համար, և ի՞նչ է մեզ սպասվում առաջիկա օրերին. այս և այլ հարցերի շուրջ «Անտինոմիա»-ի տաղավարում կզրուցենք Հայաստանի գործատուների միության նախագահ Գագիկ Մակարյանի և Հայաստանի արտահանողների միության նախագահ Րաֆֆի Մխչյանի հետ: