Հոկտեմբերի սկզբից ՀԱԿ-ը զգուշացրել է, որ տնտեսության այս պարազիտային, օլիգարխիկ մոդելը, որ հիմնված է մենաշնորհների և տրանսֆերտային միջոցներով ձևավորվող գնողունակության վրա, շատ խոցելի է ֆինանսական ճնշումների առաջ, հատկապես որ պահուստի ծավալը մոտեցել է վտանգավոր շեմին: Այս մասին մեզ հետ զրույցում նշեց ՀԱԿ խմբակցության ղեկավար Լևոն Զուրաբյանը:
Նրա խոսքերով՝ ինքը նախկինում մի քանի անգամ նշել է, որ երկիրը մոտենում է տնտեսական համակարգի կոլապսին: «Մեզ ասացին՝ այդպիսի բան չկա, ամեն բան նորմալ է, գնում է շատ կայուն ձևով: Հիմա մենք ունենք այն կոլապսը, որի մասին զգուշացրել ենք մի քանի ամիս առաջ: Մենք ունենք այնպիսի գնաճ, որը չի համապատասխանում դրամի արժեզրկման տեմպին: Այսինքն` այն շատ ավելի բարձր է, քան դրամի արժեզրկումը, թեև պիտի լիներ հակառակը: Օրինակ՝ շաքար բերողը բոլոր գործարքները միայն դոլարով չի անում, շատ ծախսեր դրամով է անում, և բնական է, որ եթե դրամն արժեզրկվում է, ասենք՝ 30 տոկոսով, ապա գնաճը պիտի լիներ, ասենք՝ 20 տոկոս, բայց ստանում ենք ավելի մեծ գնաճ, քան դրամի արժեզրկումը: Սա նշանակում է, որ ունենք գնաճ մենաշնորհային համակարգի պայմաններում, որի համար պատասխանատու է այն իշխանությունը, որը ստեղծել է այս վիճակը»,- ընդգծեց նա:
Հարցին, թե արդյո՞ք սա նշանակում է, որ կառավարությունը պետք է հրաժարական տա, Զուրաբյանը հիշեցրեց, որ իրենք 2008-ից ամբողջական իշխանափոխություն են պահանջում: Նա կարծիք հայտնեց, որ ՀՀԿ-ական կառավարությունների փոփոխությամբ ոչինչ չի ավարտվելու, ավելի է խորանալու ճգնաժամը: «Մեր խոսքերը լրիվ հաստատվում են: Իհարկե պիտի գնան, ներկա վարչապետն իր ողջ կառավարությամբ ոչ կոմպետենտ մարդիկ են, որոնց նպատակը սեփական հարստացումն է, բայց միայն իրենց գնալով ոչ մի հարց չի լուծվի, պետք է գնա նաև Սերժ Սարգսյանն իր ՀՀԿ-ի հետ: Այլապես ինչ տեղի է ունենում, շարունակելու է տեղի ունենալ էլի մեր ժողովրդի հաշվին, վերջին կոպեկներն էլ պիտի խլեն, իրենց միլիարդները կուտակեն, վերջում էլ փախչեն երկրից»,- ասաց նա:
Անդրադառնալով իշխանությունների հայտարարություններին, թե դրամի կտրուկ անկման պատճառը սպեկուլյանտներն են, Լևոն Զուրաբյանն արձագանքեց. «Իշխանություններն այդ հարցը արհեստականորեն դնում են շրջանառության մեջ՝ շեղելու համար իրական պատճառներից, իսկ իրական պատճառը նրանց ստեղծած արատավոր համակարգն է, որը հանգեցրել է այս կոլապսին, և որի դեմը նրանք չեն կարողանում առնել: Հայաստանում խեղդում են ձեռնարկատիրությունը, արհեստականորեն վիճակը պահում էին տրանսֆերտներով: Հիմա տրանսֆերտներն էլ անկում են ունենում ՌԴ-ում իրավիճակի պատճառով: Այդ պրոցեսները դառնում են շատ մեծ ճնշում, որի առջև մենք խոցելի ենք, քանի որ չունենք մեր ինքնուրույն տնտեսական համակարգը»,- ընդգծեց Լևոն Զուրաբյանը: