«Առաջին լրատվական»-ի տեղեկություններով՝ այսօր ուշ ժամի քաղաքապետարանում տեղի է ունենալու տրանսպորտի նոր սակագնի հետ կապված քննարկում՝ քաղաքապետի, տրանսպորտի վարչության պետի և 20 կազմակերպությունների մասնակցությամբ:
Ըստ տեղեկութունների՝ քննարկվելու է տրանսպորտի սակագինը 200 դրամ դարձնելու հարցը, քանի որ երթուղային տաքսիների վարորդների և գծատերերի խոսքով՝ գազի թանկացումից հետո իրենք վնասով են աշխատում և չեն կարող այդպես շարունակել՝ կա՛մ պետք է գազն էժանանա, կա՛մ սակագինը բարձրանա:
Նշենք, որ վերջին օրերին ավտոգազալցակայաններում գազի 1 խմ-ը նախկին 170-190 դրամից դարձավ 230, իսկ այսօր արդեն որոշ լցակայաններում 250 դրամ է:
Գազի թանկացման հետ կապված՝ մի շարք երթուղիներ այսօր կարճ ժամանակով գործադուլ հայտարարեցին, բոյկոտեցին ուղևորափոխադրումը, սակայն քաղաքապետի տեղակալի և տրանսպորտի վարչության պետի հորդորներից հետո գծատերերը երթուղի դուրս բերեցին իրենց երթուղայինները՝ պայմանով, որ հարցն անպայման պետք է լուծում ստանա: Եվ այսօր, փաստորեն, կքննարկվի և գուցե անգամ որոշում կայացվի թանկացնել Երևան քաղաքը սպասարկող երթուղային տաքսիների սակագինը:
Իսկ երբ այդ որոշումը կայացվի, անդրադարձ կկատարվի նաև միջմարզային երթուղիների սակագնին:
