Կենտրոն և Նորք-Մարաշ վարչական շրջանների ընդհանուր իրավասության դատարանում Արմեն Բեկթաշյանի նախագահությամբ տեղի ունեցավ Հայկ Կյուրեղյանի գործով հերթական դատական նիստը:
Ըստ մեղադրանքի՝ 30-ամյա Հայկ Կյուրեղյանը Շանթ Հարությունյանի գործով Կենտրոն և Նորք-Մարաշ վարչական շրջանների ընդհանուր իրավասության դատարանում կայանալիք նիստից առաջ 2014 թվականի հունիսի 12-ին, ժամը 11-ն անց 45 րոպեին դատարանի շենքի առջև բողոքի ակցիա անցկացնող քաղաքացիների շարքում լինելով՝ բարձրացել է դատարանի մոտ կայանած «Միցուբիշի Պաջերո» մեքենայի տանիքին, քայլել է այդ տանիքի վրայով՝ մեքենատեր Քրիստինա Ս.-ին պատճառելով 284 հազար դրամի գույքային վնաս:
Հայկը, ըստ մեղադրական եզրակացության, մեքենայի տանիքին գտնվելով, աղմկել է, որպես զենք օգտագործվող առարկայով՝ իր մոտ պահվող «Մակարով» տեսակի օդամղիչ ատրճանակով կրակոցներ է արձակել տարածքում ծառայություն իրականացնող ոստիկանության ծառայողներ Արմինե Գրիգորյանի, Սամսոն Ղարիբյանի, Միքայել Այվազյանի և Արտաշես Նիկողոսյանի ուղղությամբ, դիտավորությամբ նրանց առողջությանը պատճառել է թեթև վնասի հատկանիշներ չպարունակող վնասվածքներ:
Տեսնելով իրեն մոտեցող ոստիկաններին՝ Հայկ Կյուրեղյանը, առաջադրված մեղադրանքի համաձայն, սպառնացել է իրեն մոտենալու դեպքում ձեռքում եղած պլաստամասսայե առարկայով պայթեցնել բազմության մոտ կայանված մեքենան:
Հայկ Կյուրեղյանը կրակել է իրեն մեքենայի տանիքից իջեցնելու փորձ կատարող ոստիկան, վաշտի հրամանատար Արայիկ Աբելյանի ուղղությամբ, նրա առողջությանը պատճառել է թեթև վնաս՝ առողջության կարճատև քայքայումով՝ ճակատի աջ կեսի սալջարդ վերքի ձևով:
Հայկ Կյուրեղյանը մեղադրվում է զենքի գործադրմամբ կատարած խուլիգանության և ոստիկանների նկատմամբ բռնություն գործադրելով՝ նրանց չենթարկվելու համար՝ ՀՀ քրեական օրենսգրքի 258 հոդվածի 4-րդ և 316 հոդվածի 2-րդ մասերով:
Ամբաստանյալին դատարանի դահլիճում դիմավորեցին ծափահարություններով: Կյուրեղյանը նախագահողի ներս մտնելու ժամանակ դարձյալ ոտքի չկանգնեց:
Դատական նիստին նորից չէր ներկայացել նախաքննության ժամանակ Հայկ Կյուրեղյանի շահերը պաշտպանած փաստաբան Արա Զաքարյանը, ով, ըստ նիստի քարտուղարի, պատշաճ ծանուցվել էր:
Հայկ Կյուրեղյանն ասաց, թե ցանկանում է հրաժարվել պաշտպանից:
Կյուրեղյանը խոսում էր առանց ոտքի կանգնելու, նախագահողը զգուշացրեց. «Նորից նախազգուշացնում եմ կարգը խանգարելու համար, դատական նիստը կարող է շարունակվել առանց ամբաստանյալի ներկայության»:
«Ինչ ուզում եք, ոնց ուզում եք՝ որոշեք»,- ասաց Կյուրեղյանը:
«Դուք ձեզ զրկում եք դատական նիստին մասնակցելու իրավունքից»,- զգուշացրեց դատավորը:
«Ես չեմ զրկում, դուք եք ինձ զրկում այդ իրավունքից: Ես արդեն հայտարարել եմ, որ դատարանին չեմ հարգում»:
«Կարգը խախտում եք, կարող եք հեռացվել դահլիճից»,- պնդեց նախագահողը և ընթերցեց համապատասխան օրենքը՝ դատական նիստի բնականոն ընթացքը խանգարելու, դատարանին չհարգելու, դատական նիստը խոչընդոտելու համար ամբաստանյալը կարող է հեռացվել դահլիճից, և նիստը կարող է անցկացվել առանց ամբաստանյալի:
«Դուք պատշաճ ասեցիք, ես մնում եմ իմ որոշմանը: Օրենքում ասվում է, թե ամբաստանյալը կարող է հեռացվել, բայց կարող է և չհեռացվել, ձեզ է վերապահված այդ իրավունքը, իսկ իմ որոշումը մնում է նույնը. ես չեմ հարգում դատարանը, քանի որ այն համարում եմ խաղալիք դատարան, գրպանի դատարան: Եթե սա իրականում լիներ Հայաստանի Հանրապետության դատարան, կհարգեի ու ոտքի կկանգնեի»,- ասաց Հայկ Կյուրեղյանը:
Մեղադրողն ու տուժողները կարծիք չհայտնեցին:
Նախագահող դատավորի որոշմամբ ամբաստանյալի նկատմամբ սանկցիա կիրառվեց, և նա հեռացվեց դատարանի դահլիճից:
Դահլիճից դուրս եկան նաև Հայկ Կյուրեղյանի համախոհները:
Նախագահողը տեղեկացրեց, որ այս սանկցիայի կիրառման դեպքում պաշտպանի մասնակցությունը դատական նիստին պարտադիր է: Որոշվեց ներգրավել հանրային պաշտպանի: Այդ պատճառով դատական նիստը նորից հետաձգվեց
Հաջորդ նիստը նշանակվեց 2015 թվականի հունվարի 14-ին: