«Օրինաց երկիր» խմբակցության պատգամավոր Հովհաննես Մարգարյանը «Առաջին լրատվական»-ի հետ զրույցում կարծիք հայտնեց, որ եթե դոլարի փոխարժեքը մնա 500 դրամի սահմաններում, բոլորովին անհրաժեշտություն չի առաջանա բարձրացնել գազի սակագինը:
Այս օրերին, երբ ամեն օր դոլարը թանկանում է, խոսակցություններ են շրջանառվում, որ գարնանը «Գազպրոմ-Արմենիա» ընկերությունը նորից հայտ կներկայացնի հանրային ծառայությունները կարգավորող հանձնաժողովին ու կբարձրացնի գազի գինը: Չէ որ գազի սակագնի փոփոխության գործոններից մեկն էլ դոլար-դրամ հարաբերակցությունն է: Իսկ գազի գործող սակագնի ձևավորման հիմքում 1 դոլարը 419 դրամ է հաշվարկված, ինչը այսօր մոտ 100 դրամով պակաս է գործող փոխարժեքից:
Հ. Մարգարյանը կարծում է, որ գազի տեղափոխման ու բաշխման ցանցերում բավական բարձր տոկոսով են ֆիքսվել կորուստները: Իսկ կորուստների այդ քանակը բարձրացնում է գազի սակագինը: Բացի այդ, նա կրկնում է այն հայտնի միտքը, թե անհիմն է, որ սահմանին մոտ 190 դոլար արժեցող 1000 խորանարդ մետր գազը արդեն վերջնական սպառողին հասնում կրկնակի թանկ գնով: Այս ու այլ մտահոգությունները թույլ են տալիս մտածելու, որ գազի գործող գինը ահռելի շահույթներ է ապահովում բաշխող ընկերությանը, և որ այդ շահույթների հաշվին հնարավոր է առայժմ չբարձրացնել սակագինը: