«Չեմ բացառում, որ ԱՄՆ-ը հայ տնտեսվարողների համար որոշակի արտոնություններ ապահովի»,- «Առաջին լրատվական»-ի հետ զրույցում ասաց ԼՂՀ նախկին արտգործնախարար Արման Մելիքյանը՝ անդրադառնալով ԱՄՆ Պետդեպի տարածած վերջին օրերի հայտարարություններին:
Նա նշեց, որ Հայաստանի աշխարհագրական դիրքն ու աշխարհաքաղաքական նշանակությունն այսօր այնպիսին են, որ անգամ լինելով Եվրասիական տնտեսական միության ու ՀԱՊԿ անդամ՝ այն, գոնե առաջիկա մեկ տարվա ընթացքում, հազիվ թե ԱՄՆ կողմից ենթարկվի ուղղակի պատժամիջոցների, թեև Ռուսաստանի հանդեպ կիրառվող պատժամիջոցների ռեժիմը մեր երկրի վրա անշուշտ կանդրադառնա:
Այնուամենայնիվ, Արման Մելիքյանը չի բացառում նաև, որ Հայաստանի պարագայում ԱՄՆ-ը կարող է որոշակի քայլերի գնալ՝ մեր երկրի տնտեսվարողների համար ապահովելու որոշակի արտոնություններ, եթե վերջիններս ավելի ակտիվ գործընկերային հարաբերություններ հաստատեն արևմտյան, թուրքական, իսկ ավելի ուշ՝ անգամ նաև պարսկական ընկերությունների հետ:
«Առաջիկայում հավանաբար հատուկ կարևորություն ձեռք կբերեն հայ-վրացական տնտեսական համագործակցության խթանմանն ուղղված հետևողական ջանքերը: Մեզ համար թիվ մեկ խնդիրը կմնա ՀՀ պետական կառավարման համակարգի կարողունակության ապահովումը՝ այսօր այդ համակարգը բարոյական ու մասնագիտական քայքայման արտահայտված միտումներ է դրսևորում և գործնականում զրկված է քաղաքացիների վստահությունից ու նվազագույն իսկ աջակցությունից: ՀՀ պետական գանձարանի կողոպտիչների հետագա պաշտոնավարումը հայկական շահերի ներկայիս ամենամեծ սպառնալիքն է, անկախ նրանից՝ կշարունակվի՞ արդյոք ռազմավարական համագործակցությունը Ռուսաստանի հետ, թե՞ իրադրության արմատական փոփոխության համատեքստում կհայտնվեն նոր վստահելի գործընկերներ»,- մեկնաբանեց Արման Մելիքյանը:
Հիշեցնենք, որ ԱՄՆ Պետդեպի ներկայացուցիչ Ջեն Պսակին նշել էր, որ աշխարհի բոլոր երկրները պետք է հրաժարվեն Մոսկվայի հետ գործարար հարաբերություններից:
Պետդեպի ներկայացուցչի հայտարարությունը հնչեց Վլադիմիր Պուտինի՝ վերջերս Հնդկաստան կատարած այցից հետո, որի ընթացքում ձեռք բերվեցին տնտեսական բնույթի բազմաթիվ պայմանավորվածություններ, մասնավորապես՝ ստորագրվեց շրջանակային պայմանագիր «Կուդանկուլամ» ԱԷԿ-ի 3-րդ և 4-րդ բլոկների շինարարության մասին: Ավելի վաղ Պսակին Պետդեպի անունից մտահոգություն հայտնեց այն փաստի առնչությամբ, որ Պուտինին ուղեկցում էր Ղրիմի ղեկավար Սերգեյ Ակսյոնովը:
Մինչդեռ դեկտեմբերի 12-ին Պսակին հայտարարել է, որ հայ-ռուսական ինտեգրումը ԵՏՄ շրջանակներում չի վնասի Վաշինգտոնի և Երևանի հարաբերություններին: Նա նշել է, որ «բոլոր երկրներն իրավունք ունեն ինքնուրույն ընտրելու տնտեսական ինտեգրման ու զարգացման ճանապարհը՝ ելնելով սեփական շահերից»: «Աշխարհի ոչ մի երկիր իրավունք չունի որոշել մեկ այլ պետության քաղաքական ու տնտեսական կողմնորոշումը»,- ասել է դիվանագետը:
«ԱՄՆ-ը կշարունակի աշխատել Հայաստանի հետ՝ սատարելով ժողովրդավարական ու տնտեսական բարեփոխումների անցկացումն ու ԱՄՆ-ՀՀ հարաբերություններում կօգնի պահպանել արձանագրված առաջընթացը»,- ասել է Պսակին: