ՀՀ սպորտի և երիտասարդության հարցերի նախարար Գաբրիել Ղազարյանը ՂազախստանիՀանրապետության Սպորտի և ֆիզիկական կուլտուրայի հարցերով կոմիտեի նախագահ Իլսիյար Կանագատովի հետ Ալմաթիում ստորագրել է Հուշագիր` ֆիզիկական կուլտուրայի, սպորտի և սպորտային բժշկության զարգացման ուղղությամբ աշխատանքների արդյունավետության բարձրացման նպատակով:
Համաձայն ստորագրված Հուշագրի` երկու երկրների միջև, փորձի փոխանակման նպատակով պարբերաբար կիրականացվեն կրթարանների մարզիչ-մանկավարժների և մարզական քոլեջների սաների փոխայցելություններ: Կողմերը պայմանավորվել են նաև համագործակցել գիտամեթոդական և գիտական տեղեկատվության փոխանակման ուղղությամբ:
Նախարար Ղազարյանն այցելել է Ալմաթիում տեղակայված մարզաբազաներ, եղել է Օլիմպիական հերթափոխի պատրաստման քոլեջներում, շրջայց կատարել Սպորտային բժշկության և վերականգնողական կենտրոնում:
Գաբրիել Ղազարյանը ծանոթացել է մարզաբազաների պայմաններին, տեղեկացել տարբեր մարզաձևերի և սպորտային բժշկության զարգացման ուղղությամբ տարվող աշխատանքներին:
Աշխատանքային այցի վերջում նախարարը Ղազախստանի Հանրապետության իր գործընկեր Իլսիյար Կանագատովին հրավիրել է գարնանը փոխադարձ այցելություն կատարել Երևան, որտեղ նախատեսվում է ստորագրել երկկողմ Համաձայնագիր` ֆիզիկական կուլտուրայի և սպորտի զարգացման ուղղությամբ:
Հիշեցնենք, որ նախարար Գաբրիել Ղազարյանը Ղազախստանի Ալմաթի քաղաքում էր գտնվում «Սպորտային բժշկության զարգացման արդի հիմնախնդիրները ներկա փուլում» թեմայով միջազգային սեմինարին մասնակցելու նպատակով:
Հայաստանի սպորտի և երիտասարդության հարցերի նախարարության մամլո ծառայություն