Ադրբեջանական Aze.az կայքի փոխանցմամբ, գերմանական Handelsblatt թերթի վերլուծաբան Ֆլորիան Վիլլերսհաուզենն իր հոդվածում անդրադարձել է Nabucco գազատարի կառուցման խնդիրներին.
«ԵՄ-ը ցանկանում է նվազեցնել ռուսական գազից ունեցած իր կախվածությունը, ինչի համար էլ շեշտը դնում է Nabucco գազատարի վրա: Սակայն այսօր դրա կառուցումը հայտնվել է աննախադեպ մեծ վտանգի տակ:
Այս տարի Ադրբեջանը պետք է երկու կարևոր որոշում կայացնի` Եվրոպային գազով ապահովելու տեսանկյունից: ԵՄ-ը մի կողմից ցանկանում է ապագայի համար ադրբեջանական խոշոր գազահանքեր ներթափանցելու թույլտվություն ստանալ` դրանով իսկ ազատվելով ռուսական «Գազպրոմի» ճիրաններից:
Իսկ մյուս կողմից էլ` մոտակա ամիսներին պարզ կդառնա, թե արդյո՞ք ադրբեջանական գազը կառաքվի Բրյուսելի կողմից ռազմավարական նախագիծ որակված Nabucco գազատարով:
Ադրբեջանի որոշումից է մեծապես կախված ամեն ինչ, քանի որ առանց ադրբեջանական գազի, Nabucco-ն դառնում է անիմաստ: Նախագծի իրականացման կոնսորցիումի գնահատմամբ, ոչ պակաս խոշոր գազահանքեր ունեցող մյուս մատակարարների (Թուրքմենստան կամ Իրաք) հետ բանակցությունների վարումը նպատակահարմար է համարվում միայն ադրբեջանական կողմի դրական պատասխանից հետո:
Սակայն Nabucco-ի վտանգի տակ հայտնվելու միակ պատճառը Ադրբեջանի դեռևս չկայացրած որոշումը չէ: Բանն այն է, որ Nabucco-ի մրցակից հանդիսացող ռուսական «Հարավային հոսք» նախագիծն արդեն իրեն ապահովել է գազով և դրա վաճառաշուկայով:
Դեռևս պարզ չէ, թե արդյո՞ք կենտրոնասիական գազը կառաքվի Nabucco գազատարով: Այդ տեսանկյունից Ռուսաստանն առջևում է 1:0 հաշվով: Մի՞թե դա Բրյուսելի պարտությունը չէ: Ադրբեջանը հայտարարում է, որ իր պատասխանի մասին կբարձրաձայնի միայն տարեվերջին: Վերջին հաշվով, Եվրոպան Ադրբեջանից ավելի շատ է կախված, քան ընդհակառակը»:
Հիշեցնենք, որ Nabucco գազամուղի անվանումն առաջացել է բաբելոնյան Նաբուգոդոնոսոր արքայի անունից: Խողովակաշարի մեկնարկը նախատեսված է 2012 թվականին, այն ունենալու է 3300 կիլոմետր երկարություն և տարեկան 31 միլիարդ խորանարդ մետր թողունակություն:
Այս տարեսկզբին գերմանական քաղաքագետ, էներգետիկ քաղաքականության գծով փորձագետ Ալեքսանդր Ռաարը հայտարարեց, որ 2011 թվականը վճռորոշ է լինելու Nabucco գազատարի համար` նշելով, որ Թուրքիան այն միակ երկիրն է, առանց որի անհնար է դառնում Ռուսաստանի տարածքը շրջանցող և Կենտրոնական Ասիայից դեպի Եվրոպա ձգվող որևէ խողովակաշարի կառուցումը.
«Թուրքիան Nabucco և «Հարավային հոսք» գազամուղների միջև պայքարի գլխավոր հաղթողն է: Առաջիկայում Անկարան չի պատրաստվում իրեն սահմանափակել միայն տարանցիկ երկրի կարգավիճակով, ինչպես որ ներկայումս է: Օգտագործելով իր բարենպաստ աշխարհաքաղաքական դիրքը` Անկարան վերածվելու է գազը վերավաճառող երկրի: Դա բավականին կամրապնդի Եվրոպայի ու Ասիայի միջև Թուրքիայի ունեցած էներգետիկ կամրջի դերը: Սակայն ժամանակը ցույց կտա, թե Եվրոպան որքանով Թուրքիային կթույլատրի ձեռք բերել նման կարգավիճակ»: