«Ինքնիշխանության զիջումը շատ դեպքերում ցանկալի է»,- այս մասին այսօր լրագրողների հետ զրույցում ասաց ՀՀ նախկին վարչապետ, Հայ-ռուսական (սլավոնական) համալսարանի ռեկտոր Արմեն Դարբինյանը՝ անդրադառնալով դրամի արժեզրկմանը, եվրասիական ինտեգրացիոն նախագծերին:
Նա զարմանքով նշեց, թե ո՞ր երկրներում ազգային արժույթը չի արժեզրկվում: Ըստ նրա՝ այն երկրներում, որտեղ կա արտարժույթի հստակ երաշխավորված ներհոսք: «Արդյոք մեր երկրում երաշխավորված ներհոսք կա՞: Պատասխանում եմ, որ ոչ: Ո՞րն է մեր երկրի արտարժույթի ներհոսքի աղբյուրը: Հանքարդյունաբերություն, որը կապված է արտաքին գործոնի հետ, և մասնավոր դրամական տրանսֆերտները, որոնք նույնպես կապված են արտաքին գործոնի հետ: Երրորդը չկա՝ չհաշված մեր օտարերկրյա տարբեր կազմակերպությունների հետ պայմանավորվածությունների հիման վրա եկող գումարները: Ցավոք սրտի, երկրում մասնավոր օտարերկրյա ներդրումների աճ չի գրանցվում, երկիրն այդ իմաստով հետաքրքիր չէ, և ուրեմն երաշխավորված արտարժույթի ներհոսք չկա»,- ասաց Արմեն Դարբինյանը:
Նա նշեց, որ այն դեպքերում, երբ Հայաստանի ԵՏՄ-ին անդամակցությունը փորձում են հիմնավորել ներդրումային աճով,այդ կապակցությամբ այդքան էլ լավատես չէ: Թեև նա միաժամանակ կարևորեց ԵՏՄ-ին անդամակցությունը տեխնոլոգիաների տրանսֆերի տեսանկյունից, որովհետև իրավիճակից պետք է կարողանալ առավելագույնս օգտվել:
«Ցանկացած դիվանագիտական, պետական կառավարման, միջազգային հարաբերությունների խնդիրն է ստեղծված իրավիճակից առավելագույն օգտվել: Շանս է առաջացել ռուսական տեխնոլոգիաներից օգտվելու»,- ասաց նա:
Անդրադառնալով Հայաստանի և ԼՂ-ի միջև մաքսակետի հնարավոր տեղակայմանը՝ Արմեն Դարբինյանն ասաց, որ այդ հարցը չի կարևորում: Նրա համոզմամբ՝ նման հարց գոյություն չունի: Ինչ վերաբերում է ԵՏՄ-ում ՀՀ ինքնիշխանության կորստին, Արմեն Դարբինյանն ասաց, որ ինքնիշխանությունը հնարավոր չէ դիտարկել իր աբսոլյուտի մեջ: «Ցանկացած մի համագործակցության մեջ կա սուվերեն իրավունքի զիջում ի շահ տնտեսական, քաղաքական, աշխարհաքաղաքական, ռազմական խնդիրիների: Եթե կա խնդիր, դա պետք է լուծել և դրա համար զոհաբերել ինքնուրույնության, ինքնիշխանության մի որոշակի հատված: Դա ոչ միայն հնարավոր է, այլև շատ դեպքերում ցանկալի»,- ասաց նախկին վարչապետը:
