Չի բացառվում, որ ՀԱՊԿ-ը բողոքի նոտա հղի Ադրբեջանին. ՀԱՊԿ-ն ինչ-որ կերպ պետք է արձագանքի ուղղաթիռի խոցմանը: «Առաջին լրատվական»-ի հետ զրույցում այս մասին ասաց Ռազմական կանխատեսման կենտրոնի տնօրեն, ռուսաստանցի ռազմական փորձագետ Անատոլի Ցիգանոկը՝ անդրադառնալով ՀԱՊԿ գլխավոր քարտուղար Նիկոլայ Բորդյուժայի ՀՀ կատարած այցին և խոստումներին, թե ուղղաթիռի խոցումն ադրբեջանական օդուժի կողմից կքննարկվի ՀԱՊԿ դեկտեմբերին կայանալիք նիստին:
Ցիգանոկը, նախ անդրադառնալով ուղղաթիռի միջադեպին, այն համեմատեց ՆԱՏՕ-ի սեմինարի ժամանակ Գուրգեն Մարգարյանի սպանության հետ Ռամիլ Սաֆարովի կողմից, հատկապես երբ այդ ուղղաթիռը օդ էր բարձրացել առանց զենքի: «Երբ այդ ուղղաթիռն ընկավ չեզոք գոտի, և տեղեկատվություն տարածվեց, որ անձնակազմի անդամներից մեկը մահացել է արյան կորստից, ադրբեջանական կողմը պարտավոր էր թույլ տալ բժիշկներին մուտք գործել չեզոք գոտի, սակայն չարեց՝ վատթարացնելով հակամարտող կողմերի միջև իրավիճակը»,- ասաց Ցիգանոկը՝ շարունակելով, որ դրան պետք է արձագանքի ՀԱՊԿ-ը, որի անդամն է Հայաստանը:
Ըստ նրա՝ ՀԱՊԿ անդամներից որևէ մեկի դեմ ագրեսիայի դեպքում, թեև այս դեպքում խոսքը Ղարաբաղի մասին է, ՀԱՊԿ-ը պետք է ինչ-որ կերպ արձագանքի: Ցիգանոկի խոսքով՝ ՀԱՊԿ քննարկումներն անցկացվում են որոշելու համար այդ արձագանքի ձևը: Ռուսաստանցի ռազմական վերլուծաբանը չի բացառում, որ որպես տարբերակ՝ ՀԱՊԿ անդամները ընտրեն բողոքի նոտան Ադրբեջանի իշխանություններին:
«Երբ ՌԴ նախագահն այցելեց Ադրբեջան, Բաքվում ասաց, որ ՀՀ-ն իր ռազմավարական գործընկերն է, իսկ Ադրբեջանը՝ գործընկեր, որը ենթադրում է, որ բախումների վերսկսման պարագայում Ռուսաստանը կկանգնի Հայաստանի կողքին»,- ասաց նա:
Հիշեցնենք, որ օրերս ՀՀ նախագահ Սերժ Սարգսյանն ընդունեց աշխատանքային այցով Հայաստանի Հանրապետություն ժամանած Հավաքական անվտանգության պայմանագրի կազմակերպության (ՀԱՊԿ) գլխավոր քարտուղար Նիկոլայ Բորդյուժային: Նրանք իրենց երկխոսության ընթացքում անդրադարձել էին օրերս ադրբեջանական զինված ուժերի կողմից ԼՂ ԶՈՒ ուսումնավարժական թռիչք իրականացնող ուղղաթիռի խոցման միջադեպին և դրա հետևանքով առաջացած իրավիճակին, որը, Նիկոլայ Բորդյուժայի հավաստմամբ, քննարկման թեմա կդառնա նաև ՀԱՊԿ Հավաքական անվտանգության խորհրդի նստաշրջանում: