Ամերիկացի դերասան Ջոնի Դեփը խոստովանել է, որ իր հայտնիության պատճառով ապրում է փախստականի պես: Միևնույն ժամանակ խոստովանել է, թե «թքած ունի», որ իր մասնակցությամբ ֆիլմերից մեկը կարող է տապալվել: Այս մասին Դեփն ասել է Details ամսագրին տված հարցազրույցում:
«Իսկական հաճույք է պատճառում այն, որ դու, ինչպես Մառլոն Բրանդոն, հասնում ես այն կետին, որտեղ կարող ես թքած ունենալ»,- անկեղծացել է 51-ամյա դերասանը՝ նկատի ունենալով քննադատների կարծիքն ու ֆիլմերի հաջողությունը: Ջոնիի խոսքով՝ իր կարիերայում եղել են ժամանակներ, երբ ինքը, հակառակը, շատ է մտահոգվել դրա համար, սակայն հիմա «ազատ» է դարձել:
«Անսպասելիորեն, շատ առօրյա բաներ քեզ դադարում են անհանգստացնել, ու դու հասկանում ես, որ այդ ամենը հիմարություն է, իսկ երբ դու թքած ունես, դա էլ հենց լիակատար ազատագրումն է: Խաղալ, որպեսզի փորձես ամեն ինչ՝ ահա իսկական հաճույքը»,- ասել է Դեփը: