ԱՊՀ երկրները դիտարկում են Համագործակցության տարածքում ավելացված արժեքի հարկի գումարի վերադարձման համակարգի ներմուծման հնարավորությունը՝ Եվրոպայում գործող tax free-ի նման: Այս մասին հայտարարել է ԱՊՀ զբոսաշրջային հարցերով խորհրդի նախագահ, Բելառուսի զբոսաշրջության փոխնախարար Չեսլավ Շուլգան Սանկտ Պետերբուրգում ԱՊՀ միջխորհրդարանական վեհաժողովի լիագումար նիստում, փոխանցոմ է TASS գործակալությունը:
Գաղափարի հեղինակների կարծիքով՝ այդ միջոցառումը կարող է բարձրացնել ԱՊՀ երկրների զբոսաշրջային գրավչությունը: Շուլգայի խոսքով՝ այս տարի զբոսաշրջային շուկայում առաջացած խնդիրները հաշվի առնելով՝ անհրաժեշտություն է առաջացել նաև մշակելու զբոսաշրջային ծառայությունների տրամադրման որակի նոր չափորոշիչներ:
Սպասվում է, որ նորմերը կնույնականացվեն ԱՊՀ-ում զբոսաշրջության զարգացման ծրագրի բոլոր մասնակից երկրների համար:
Հնչել է նաև ԱՊՀ-ի համար զբոսաշրջային շենգենի ստեղծման գաղափարը:
Նշվում է, որ վեհաժողովի կայքում այս տարի անցկացվում է հարցում: Մասնակիցներն ընտրում են, թե ԱՊՀ որ երկիր կցանկանային այցելել: Առաջատարը դեռևս Ղրղըզստանն է: