«Իմ կարծիքով՝ այդ հարցը եռյակում դեռ մեկ շաբաթ առաջ էր քննարկվել, և քննարկման արդյունքների մասին տեղյակ է պահվել թե՛ Հովիկ Աբրահամյանին, թե՛ Գալուստ Սահակյանին»,- «Առաջին լրատվական»-ի հետ զրույցում ասաց ՀԱԿ խմբակցության պատգամավոր Լյուդմիլա Սարգսյանը՝ անդրադառնալով 12 կետերին վերաբերող Հովիկ Աբրահամյանի հայտարարությանը:
Վերջինս, հիշեցնենք, հինգշաբթի օրը Հանրապետական կուսակցության գործադիր մարմնի նիստից առաջ լրագրողների հետ զրույցում հայտարարել էր, թե , թե ընդունում է այդ կետերից նախ 10-րդը քննարկելու առաջարկը: Իսկ 10-րդ կետով ոչիշխանական ուժերը պահանջում էին փոփոխություններ կատարել Ընտրական օրենսգրքում, որոնց համաձայն պետք է անցում կատարել 100 տոկոս համամասնական ընտրակարգին և ընտրություններից հետո հրապարակել ընտրություններին մասնակցած մարդկանց ցուցակը:
Լ.Սարգսյանը նաև նշեց, որ քննարկմանը համաձայնելը մի բան է, իսկ որոշման գալը՝ մեկ այլ բան: «Իրենք մեր մոտեցումը գիտեն, թող սկսեն այդ ճանապարհը, թող սկսեն այդ հարցի լուծումը: Եվ գուցե այդ ժամանակ հնարավոր կլինի այդ հարցին համատեղ լուծում տալ, բայց ես կարծում, որ նպատակն այլ է: Սերժ Սարգսյանն ընդամենը բարի նախագահի դերի մեջ փորձեց մտնել և ցույց տալ, որ կառավարությունը նորից կվերանայի 12 կետերը»,- ասաց նա:
Հարցին, թե ՀԱԿ-ը կամ եռյակը դեկտեմբերի 5-ին կմասնակցե՞ն Ազատության հրապարակում «Ժառանություն կուսակցության ղեկավար Րաֆֆի Հովհաննիսյանի հավաքին, Լ.Սարգսյանն այսպես պատասխանեց. «Ոչինչ չի քննարկվել, քանի որ Րաֆֆի Հովհաննիսյանը ոչ մեկին առանձնապես այդ մասին տեղյակ չի պահել, այլ ընդամենը ասուլիսի միջոցով է տեղյակ պահել իր գործընկերներին: Ես անձամբ գնալու եմ, որպեսզի տեսնեմ, թե նա ինչ թեզերով է հանդես գալիս. ինձ հետաքրքիր է:
Սարգսյանը նշեց, որ ոչ մի կերպ չի վերաբերվում Նիկոլ Փաշինյանի՝ Սերժ Սարգսյանին իմպիչմենտ ներկայացնելու հայտարարությանը: «Պետք է հիշեցնեմ, որ Նիկոլ Փաշինյանը «Հայ ազգային կոնգրես» դաշինքի միջոցով է մտել Ազգային ժողով և հիմա խմբակցության անդամ է, իսկ խմբակցությունն առ այսօր այդ փաստաթղթից տեղեկություն չունի: Երբ կլինի փաստաթուղթը, կլինի նաև կարծիք»,- հավելեց քաղաքական գործիչը: