Հունաստանի անտիկ շրջանի Ամֆիպոլ քաղաքում սկսվել է Ալեքսանդր Մակեդոնացու ժամանակների դամբարանի պեղումների երկրորդ փուլը: Այս մասին հայտնում է TASS-ը՝ հղում անելով Հունաստանի մշակույթի և սպորտի նախարար Կոնստանտինոս Տասուլասին:
Նոր պեղումների համար խթան է դարձել քարե հատակի տակ հուղարկավորության երրորդ խցի հայտնաբերումը, որում գտնվել է կմախք, ըստ ամենայնի՝ շատ ազնվազարմ մարդու, և փայտե դագաղի մնացորդներ: Այդ գտածոյի մասին հայտարարվել է նոյեմբերի 12-ին:
Նախարարության ներկայացուցիչների կարծիքով՝ հին բլուրում, որտեղ մ.թ.ա. IV դարի գերեզմանոց է հայտնաբերվել, կարող է էլի գերեզման լինել:
Խցերից մեկում հայտնաբերվել է մ.թ.ա. 4-րդ դարի 3 մետր լայնությամբ և 4.5 մետր երկարությամբ խճանկար: Որոշ հնագետներ ենթադրում են, որ դամբարանը կարող էր պատկանել Ալեքսանդր Մակեդոնացու ընտանիքի անդամներից մեկին, օրինակ՝ նրա կնոջը՝ Ռոքսանային, կամ որդուն՝ Ալեքսանդր IV-ին:
Տասուլասը նշել է, որ հնագետներն ուսումնասիրություն են սկսում էլեկտրական տոմոգրաֆիայի մեթոդով, որը մշակել է Սալոնիկի Արիստոտելի անվան համալսարանի գիտնականների խումբը: Այդ ուսումնասիրության արդյունքները սպասվում են մոտ ժամանակներս: Նրա խոսքով՝ «պեղումների առաջին փուլն ավարտված է, սկսվում է հաջորդը, որը խոստանում է նոր էական բացահայտումներ»:
