«Ժողովուրդ» օրաթերթը տեղեկություն է հրապարակել այն մասին, որ մոտ երկու շաբաթ առաջ Ժնևում հանդիպել են Ռոբերտ Քոչարյանն ու Գագիկ Ծառուկյանը և ներքաղաքական հարցեր են քննարկել: Երկու կողմն էլ ըստ էության չեն հերքել հանդիպման մասին տեղեկությունը:
Թե ինչու են Հայաստանի քաղաքացիներ Ծառուկյանն ու Քոչարյանը Ժնևում քննարկում ներքաղաքական հարցերը՝ դժվար է ասել, սակայն դա, բնականաբար, իրենց իրավունքն է. կարող են քննարկել նույնիսկ Լուսնի վրա: Ի վերջո, և՛ Ծառուկյանը, և՛ Քոչարյանը բիզնեսմեններ են և շատ են ճանապարհորդում, այնպես որ ներքաղաքական հարցերին կարող են և անդրադառնալ ճանապարհորդությունների արանքում՝ համատեղելով բիզնեսն ու քաղաքականությունը:
Երկու շաբաթ առաջ Հայաստանում ներքաղաքական կյանքը ստվերել էր հայկական ուղղաթիռի խոցման միջադեպն ու դրա շուրջ ստեղծված անորոշ և լարված իրավիճակը՝ Հայաստանի համար նվաստացուցիչ երանգներով: Իսկ բուն ներքաղաքական կյանքում անհարմար ու անորոշ վիճակ էր ստեղծվել եռյակի ներսում, որտեղ ՀԱԿ-ը ԲՀԿ-ին էր դիտողություններ ներկայացնում, «Ժառանգությունը» փորձում էր հիշեցնել իր մասին: Սակայն այս հարթության վրա առանցքայինը Սերժ Սարգսյանի հայտարարությունն էր 12 կետերի վերադառնալու պատրաստակամության մասին: Եվ, ամենայն հավանականությամբ, Ռոբերտ Քոչարյանն ու Գագիկ Ծառուկյանը Ժնևում քննարկել են այդ հարցերը և եռյակի, իսկ իրականում, իհարկե, ԲՀԿ-ի պատասխանի հարցը Սերժ Սարգսյանին:
Այս պատասխանն ընդհանուր առմամբ մերժողական չէ, և այսօր մենք ականատես ենք մի գործընթացի, երբ ԲՀԿ-ն ու Սերժ Սարգսյանը կարծեք թե փորձում են դուրս գալ բանակցությունների համար առավել հարմար դիրքերի, և տեղի է ունենում նախաբանակցային դիրքային պայքար: Եվ հենց այդ պայքարի գործընթացում հետաքրքրական է Ռոբերտ Քոչարյանի դերակատարության մասին հիշատակումը:
Սա կարող է ունենալ և՛ այսպես ասած՝ արտաքին նշանակություն, և՛ ներեռյակային: Նախ, նման հանդիպման մասին տեղեկատվությամբ ԲՀԿ-ն որոշակիորեն անհարմար վիճակի առաջ է դնում եռյակի մյուս երկու գործընկերներին, որոնք ամեն կերպ հերքում են Ռոբերտ Քոչարյանի հետ ԲՀԿ-ի կամ եռյակի կապերը: Այս պայմաններում Քոչարյանի հետ շփումները ԲՀԿ-ի համար ՀԱԿ-ին ու «Ժառանգությանը» հոգեբանական գրոհի ենթարկելու տարբերակներ են: Իսկ քանի որ վերջին շրջանում ՀԱԿ-ն ու «Ժառանգությունը» որոշակի դիտողություններ ունեն ԲՀԿ-ին՝ ուղղակի կամ անուղղակի, ապա Քոչարյանի անվան հիշատակումով ԲՀԿ-ն ըստ երևույթին փորձում է երկու ուժերին ակնարկել, որ հասարակության առաջ անհարմար բացատրություններ տալու անհրաժեշտությունից խուսափելու համար նրանք պետք է քիչ բացատրություններ պահանջեն ԲՀԿ-ից:
Ինչ վերաբերում է, այսպես ասած, արտաքին ազդեցությանը, ապա այստեղ Քոչարյանի հետ կապի վերաբերյալ հիշատակումները, ըստ էության, ԲՀԿ-ի համար կարող են որոշակիորեն աջակցություն ապահովել իշխող համակարգի ներսում, ի մասնավորի՝ ՀՀԿ օլիգարխիկ մի շարք շրջանակներում, որոնք Ծառուկյանին չեն վստահի, իսկ ահա Քոչարյանի դեպքում կունենան այլ վերաբերմունք:
Բացառված չէ, որ այդպիսով ԲՀԿ-ն փորձում է դիրքային պայքարում որոշակի տրամադրություններ վերահսկել ՀՀԿ-ում: Ի դեպ՝ այս կոնտեքստում գուցե պատահական չէր Հովիկ Աբրահամյանի հայտարարությունն այն մասին, որ փորձում է ամեն ինչ անել, որ իրեն վստահեն, կառավարությանը հավատան: Խնդիրն այն է, որ եթե խաղի մեջ է Քոչարյանը, ապա խաղից դուրս է մնում Հովիկ Աբրահամյանը:
Լուսանկարը՝ armtimes.com-ի