Այսօր Լեհաստանում ՀՀ նորանշանակ դեսպան Էդգար Ղազարյանն իր հավատարմագրերի պատճենը հանձնել է Լեհաստանի ԱԳ փոխպետքարտուղար Տոմաշ Օրլովսկուն: Այս մասին հայտնում են ՀՀ ԱԳՆ մամլո գրասենյակից:
Շնորհավորելով դեսպանին նշանակման կապակցությամբ՝ փոխպետքարտուղար Օրլովսկին դրական է գնահատել հայ-լեհական հարաբերությունները` վստահություն հայտնելով, որ դրանք հետագայում ավելի կընդլայնվեն և կխորանան` ի նպաստ երկու երկրների բարեկամության:
Փոխպետքարտուղարը նշել է, որ Լեհաստանը բարձր է գնահատում Հայաստանի հետ հարաբերությունների խորացումը ինչպես երկկողմ, այնպես էլ ԵՄ Արևելյան գործընկերության ծրագրի շրջանակներում, և պատրաստ է քննարկել արդյունավետ համագործակցությանն առնչվող բոլոր այն հարցերը, որոնք կարող են նպաստել դրանց ակտիվացմանը: Տոմաշ Օրլովսկին հաջողություն է մաղթել նորանշանակ դեսպանին իր առաքելության ընթացքում և հույս հայտնել, որ նա իր նպաստը կբերի հայ-լեհական հարաբերությունների ամրապնդման և զարգացման գործում:
Շնորհակալություն հայտնելով ընդունելության և բարեմաղթանքների համար՝ դեսպան Ղազարյանը նշել է, որ Հայաստանը նույնպես կարևորում է Լեհաստանի հետ համագործակցության ընդլայնումը և վստահեցրեց, որ առավելագույն ջանքերը կներդնի հայ-լեհական բարեկամական հարաբերությունների ակտիվացման և խորացման համար։
Զրուցակիցները քննարկել են երկկողմ քաղաքական, առևտրատնտեսական համագործակցության, մշակութային ոլորտներում շփումների ակտիվացման ուղղությամբ իրականացվող քայլերը: Առանձնահատուկ կերպով նշվել է լեհահայ համայնքի` երկու ժողովուրդների բարեկամության և ջերմ հարաբերությունների ամրապնդման գործում ներդրած ավանդի ու դերի մասին: Անդրադարձ է կատարվել տարածաշրջանային և միջազգային խնդիրներին: