Ոստիկանությունում այսօր լրագրողների մասնակցությամբ ամփոփվում էին պետական պահպանության գլխավոր վարչության մատուցած ծառայություններն ու 2014 թ. կատարած աշխատանքը: Նախորդ բոլոր դեպքերում, երբ ամփոփվում էին տարբեր վարչությունների աշխատանքները, այն ներկայացնում էին վարչությունների պետերը: Բայց այսօր ՊՊԳՎ սկանդալային պետ Ռոմիկ Մկրտումյանը ներկա չէր ասուլիսին: Երբ հետաքրքրվեցինք, թե որն է պատճառը, որ պետը ներկա չէ ասուլիսին, նրա տեղակալը շտապեց ասել, որ Մկրտումյանը վատառողջ է: Իսկ փոխոստիկանապետ Սամվել Հովհաննիսյան իր հերթին ասաց, որ այս օրերին Արմավիրում զորավարժություններ են՝ կապված ատոմակայանի պահպանության հետ, քանի որ ատոմակայանը համարվում է պետական պահպանության օբյեկտ: «Դրա համար հիմա նա ոստիկանության զորքերի հրամանատարի հետ միասին ներգրավված է նախապատրաստական աշխատանքներում դեռ շաբաթվա սկզբից»,- ասաց Հովհաննիսյանը:
Մեր դիտարկմանը՝ հիմա վատառո՞ղջ է Մկրտումյանը, թե՞ զորավարժությունների է պատրաստվում, Հովհաննիսյանն արձագանքեց. «Ես ասում եմ այն, ինչ ես եմ հանձնարարել»: Իսկ Մկրտումյանի տեղակալը ավելացրեց. «Ինքը վատառողջ էլ է, անգինա ունի»:
Նշենք, որ Ռոմիկ Մկրտումյանը համակարգում աչքի է ընկնում հատկապես իր ունեցվածքով: Նա մի հսկայական առանձնատուն ունի Արեշում՝ սեփական գազանանոցով, նմատիպ մեկ ուրիշը՝ Սևանում: Բացի դրանից՝ նրան և ընտանիքին են պատկանում 05ՕՕ005 պետհամարանիշով «Մերսեդես G550», 05VV005 պետհամարանիշով «Բենթլի», 91ՍՈ111 պետհամարանիշով «Պորշե», 005ՕՕ05 պետհամարանիշով «Ռենջ Ռովեր», 14RR014 պետհամարանիշով «Տոյոտա Պրադո» ավտոմեքենաները: Մինչդեռ նա և իր ղեկավարած վարչության աշխատակիցները ստանում են բավական համեստ աշխատավարձ:
