Կալիֆոռնիան ճանաչվել է ամենաշատ գերհարուստ (30 մլն դոլարից ավել կարողություն ունեցող) բնակիչներով ամերիկյան նահանգ: Այս մասին գրում է MarketWatch-ը՝ հղում անելով Wealth-X խորհրդատվական ֆիրմայի տվյալներին:
«Ոսկե նահանգում» ապրում է 13 445 այդպիսի քաղաքացի՝ ավելին, քան Մեծ Բրիտանիայում (11 510 մարդ): Այդ թիվը 2013 թ. համեմատ ավելացել է 6%-ով: Նահանգում ամենաշատ գերհարուստ ամերիկացի կա Սան Ֆրանցիսկոյում (5 460) և Լոս Անջելեսում (5 135):
Հարուստներով ամենախիտ բնակեցված քաղաքը ԱՄՆ-ում Նյու Յորքն է՝ 8 655: Այդ ցուցանիշը Նյու Յորք նահանգին թույլ է տվել վարկանշային ցուցակում զբաղեցնել 2-րդ տեղը Կալիֆոռնիայից հետո:
Գերհարուստ բնակչության առավելագույն աճ գրանցվել է Հյուսիսային Դակոտայում՝ տարեկան 14%:
ԱՄՆ ամենահարուստ մարդը՝ Microsoft-ի հիմնադիր Բիլ Գեյթսը, ապրում է Վաշինգտոն նահանգում:
Աշխարհի բոլոր միլիարդատերերի ընդհանուր կարողությունն այդ ընթացքում ավելացել է 12%-ով՝ կազմելով 7,3 տրլն դոլար:
Դա հիմնականում ԱՄՆ-ի շնորհիվ է. այս տարի այնտեղ հայտնվել է 57 միլիարդատեր, վկայում են Wealth-X-ի և UBS-ի զեկույցի տվյալները: Ասիայում և Լատինական Ամերիկայում ու Կարիբյան ավազանում ևս մեծապես ավելացել է հարուստների թիվը՝ 52 և 42 մարդ, համապատասխանաբար: