Ուկրաինական ճգնաժամի պատասխանատվության մաս կա Գերմանիայի կառավարության վրա, կարծում է ԵՄ ընդլայնման և հարևանության քաղաքականության հարցերով նախկին գերագույն հանձնակատար Շտեֆան Ֆյուլեն: Der Spiegel-ին տված հարցազրույցում նա նշել է, որ մեկ տարի առաջ ԵՄ-ի հետ Ուկրաինայի ասոցացման մասին համաձայնագրի ստորագրումը խափանվել է ոչ միայն Ռուսաստանի նախագահ Վլադիմիր Պուտինի ճնշման պատճառով, այլև եվրոպական երկրների, այդ թվում՝ Գերմանիայի ոչ վճռական դիրքորոշման պատճառով, որոնք հրաժարվել են Ուկրաինայի համար ԵՄ անդամակցության հեռանկար բացել:
«Չի կարելի Ուկրաինային, Մոլդովային և Վրաստանին ասել, որ, մի կողմից, ռուսական Մաքսային միություն մտնելն անհամատեղելի է ԵՄ-ի հետ ասոցացման մասին համաձայնագրի հետ, մյուս կողմից՝ նրանց զրկել ԵՄ անդամ դառնալու հնարավորությունից»,- ասել է Ֆյուլեն:
Նա հիշեցրել է, որ 2013 թ. աշնանը Գերմանիան և եվրոպական այլ երկրներ հրաժարվել են Ուկրաինայի և այլ արևելաեվրոպական գործընկեր երկրների համար ԵՄ անադամագրության հեռանկար բացել և արդյունքում յուրատեսակ «սանիտարական սահման» են ստեղծել՝ բուֆերային գոտի նման այն մեկին, որն Առաջին համաշխարհային պատերազմից հետո ստեղծվել էր Արևելյան Եվրոպայում Գերմանիայի և Խորհրդային Միության միջև:
«Մենք ուկրաինացիներին փաստացի ասացինք. մենք ցավում ենք ձեր աշխարհագրական դիրքի համար, սակայն դուք չեք կարող գնալ ո՛չ դեպի Արևելք, ո՛չ դեպի Արևմուտք»,- նշել է Ֆյուլեն: Նա այդպիսի դիրքորոշումն անվանել է «չլսված» և ավելացրել, որ այն իր մեջ «խոր տխրության» զգացում է առաջացնում: