«Առաջին լրատվական»-ի զրուցակիցն է ԱԺ ՀՀԿ խմբակցության պատգամավոր Կարինե Աճեմյանը։
–Տիկին Աճեմյան, հնարավոր է՝ 2015-ին Ռուսաստանը լքի ԵԽԽՎ-ն, և արդեն կարծիքներ են հնչում, թե սա անմիջական ազդեցություն կարող է ունենալ Հայաստանի վրա. ԵՏՄ անդամակցությունից հետո նաև Հայաստանին դա կսպառնա Ռուսաստանի ճնշմամբ: Դուք չունե՞ք նման մտավախություն:
-Ես մտավախություն չունեմ, բայց նաև կատեգորիկ պատասխան չեմ տա, բայց ինքս համոզված եմ, որ մենք ԵՄ-ի հետ մեր կապերը չենք դադարեցնելու, որովհետև, ինչպես գիտեք, ԱՊՀ տարածաշրջանում, ՌԴ-ի համեմատ, մեր օրենսդրությունը, մեր բիզնես միջավայրը շատ ավելի լավ վիճակում են գտնվում, և ես կարծում եմ՝ մենք պետք է ինչ-որ ձևով մեր դաշնակիցներին մեր հետևից տանենք, ոչ թե հակառակը: Իսկ ինչ վերաբերում է կոնկրետ ԵԽԽՎ-ին, ես չէի էլ ուզենա այդ մասին մտածել:
Մեր ուղղությունները երկու դաշտում էլ պետք է հավասարապես զարգանան, որովհետև եթե մենք ԵՏՄ-ին անդամակցում ենք, դա հստակ նշանակում է՝ որոշակի պարտավորություններ են լինելու, իսկ այն պարտավորությունները, որոնք ԵՄ-ի հետ նախկինում ունեցել ենք և որ ունենք այժմ, պետք է անպայման շարունակվեն:
–Արդեն ակնհայտ է, որԱԺ-ն կվավերացնի ԵՏՄ-ին անդամակցելու փաստաթուղթը: Միքայել Մելքումյանն այսօր հայտարարեց, որ ԲՀԿ-ն կողմ կքվեարկի ԵՏՄ փաստաթղթին: Իշխանությունը վատ չի՞ զգում, որ արտաքին քաղաքականության մեջ իրեն հակակշռող ուժեր չկան:
-Շատ եմ կարևորում, որ ամեն քաղաքական ուժ հստակ դիրքորոշում հայտնի, և ուրախ եմ, որ ԲՀԿ-ն հստակ դիրքորոշում արդեն իսկ հայտնել է: Հակառակը, ես կանհանգստանայի, որ մենք այս հարցում ունենայինք իրարից շատ տարբերվող, իրար հակադրվող ուժեր լինեն, բայց սա մի հարց է, որտեղ մենք պետք է համախմբված լինենք, համախմբված աշխատենք։ Եթե համախմբված աշխատենք, մեր կորուստները քիչ կլինեն: Կրկնում եմ՝ գրագետ, համախմբված աշխատանքի դեպքում մենք կկարողանանք հաղթահարել բոլոր դժվարությունները: Իսկ դժվարություններ լինելու են, մենք տեսնում ենք՝ աշխարհը ինչպես է խառնված իրար:
Ավելին՝ տեսանյութում: