ASOS ինտերնետ-խանութը թողարկել է սեփական ամսագրի հունվարյան համարը, իսկ այդ համարի հերոսուհին է դարձել Թեյլոր Սվիֆթը: Այս մասին հայտնում է spletnik.ru-ն:
Ֆոտոշարքին կից՝ «Ինչպես դառնալ սուպերաղջիկ» վերտառությամբ հարցազրույցում Սվիֆթը պատմել է, թե ինչպես սիրային անհաջողություններն ընկալել որպես ոգեշնչման աղբյուր և իսկական ընկերներին տարբերել կեղծերից:
Թեյլորը, որի լավագույն ընկերուհիներից են Սելենա Գոմեսը և Քարլի Քլոսը, ասում է. «Շատ այսպես կոչված՝ հայտնիներ իրենց շրջապատում են շքեղ տեսք ունեցող կերպարներով, որոնք չունեն ոչ որոշակի մասնագիտություն, ոչ նախասիրություն, նրանք պարզապես ամենուր իրենց հայտնի ընկերների հետ են գնում և նրանց օգնում վստահ լինել սեփական անկրկնելիության հարցում: Նման գործարքներն ինձ չեն հետաքրքրում»:
Ի՞նչ է անում սուպերաղջիկը, երբ նրա բախտը չի բերում սիրո հարցում. ոչ ոքի համար գաղտնիք չէ, որ իր չհաջողված սիրավեպերի մասին 24-ամյա երգչուհին երգեր է գրում, որոնք հետո գլխավորում են չարթերը: Այս մասին նա ասել է. «Եթե իմ անձնական կյանքում ոչ մի ալեկոծություն չլիներ, եթե այն համաչափ լիներ, հնարավոր է՝ իմ երաժշտությունն ավելի անգույն դառնար: Հնարավոր է՝ ես մարզադաշտեր չլցնեի:
Չնայած ես կուզենայի ինձ պաշտպանել սրտի ցավից, ամոթից, բամբասանքներից՝ ես հասկանում եմ, որ իմ ամենամեծ սխալները դարձել են իմ լավագույն դասերը, իսկ երբեմն նաև՝ իմ կարիերայի գլխավոր հաջողությունները»:
Թեյլորը լիովին համաձայն է թևավոր խոսքի հետ, թե՝ կինը գեղեցիկ է հագնվում ոչ թե տղամարդկանց, այլ մյուս կանանց համար. «Ես հագուստներ եմ ընտրում՝ մտածելով, թե ինչ կմտածեն իմ ընկերուհիները: Ներկայում նրանց կարծիքն ինձ համար ավելի կարևոր է, քան մեկ ուրիշի»: