«Վերջին երկու օրվա ընթացքում առաքիչները ինչ ապրանք որ բերում են ավելի թանկ է, քան նախորդ օրերին»,- փաստում էին մթերային խանութների վաճառողները՝ կոնկերտ գներով նշելով թանկացված ապրանքները: Թանկացել է «Լուսակերտ» թռչնաֆաբրիկայի ձուն, շոկոլադները, սուրճերի տեսականին, ավելի վաղ՝ ծխախոտը, ձավարեղենը և բազմաթիվ այլ ապրանքներ: Իսկ թանկացումը քիչ չէ: Վաճառողների խոսքերով՝ այն տատանվում է 10-20 տոկոսի սահմաններում:
Մեր զրուցակից վաճառողի խոսքերով՝ առաքիչները վերջին օրերի թանկացումը պայմանավորում են դոլարի թանկացմամբ, բայց թե ինչու ապրանքների թանկացումը համաչափ չէ դոլարի թանկացման հետ՝ չեն կարող ասել: «Ասում են՝ դոլարն է թանկացել, մյուսը թե՝ ապրանքը սահմանին է կանգնած, չեն թողում, մյուսն ասում է, թե չգիտի՝ որն է թանկացման պատճառը: Բայց միշտ էլ դոլարը 1 դրամով թանկանում է, ապրանքը 10 դրամով է թանկանում, բայց երբ որ դոլարն իջնում, ոչ մի հետադարձ էժանացում չի լինում: Կարծեք թե էժանացում բառը հանված է մեր իրականությունից»,- ասաց խանութներից մեկի վաճառողը:
Սովորական գնորդները ևս իրենց մաշկի վրա օր օրի զգում են թանկացումները: Մի ապրանքը հաջորդ օրն ավելի թանկ գնով են առնում, և ոչ ոք չի բացատրում իրենց, թե ինչով են պայմանավորված այս թանկացումները: «Ամեն ինչն էլ թանկանում է, սնունդն էլ, ամեն ինչն էլ: Դրանք պայմանավորված են ոչ ճիշտ պետական ղեկավարմամբ, ոչ մի պլանավորված աշխատանք չի կատարվում, ով ինչ ուզում՝ դա էլ անում է, ինչքան ուզում՝ այնքան էլ վաճառում են: Իսկ առևտրականները ամեն ինչ անում են ոչ թե շահույթ, այլ գերշահույթ, հիպերշահույթ ստանալու համար: Դրա համար էլ մեր ժողովուրդը շատ վատ վիճակում է և այդպես էլ կմնա, մինչև ղեկավարությունը չփոխվի»,- «Առաջին լրատվական»-ի հետ զրույցում ասաց անցորդներից մեկը:
Առավել մանրամասն՝ տեսանյութում։