Կահիրեում սկսվել է Եգիպտոսի նախկին նախագահ Մուհամմեդ Մուրսիի նկատմամբ լրտեսության գործով հերթական լսումը: Այս մասին հայտնում է TASS-ը՝ հղում անելով տեղի ԶԼՄ-ներին:
Ավելի վաղ Եգիպտոսի գլխավոր դատախազությունը նրա և «Մուսուլման եղբայրների» ևս 35 առաջնորդի համար բարձրագույն պատժաչափ է պահանջել:
Լրտեսության գործով դատավարությունը սկսվել է անցած տարվա փետրվարի 16-ին: Մուրսիին և «Մուսուլման եղբայրների» մյուս առաջնորդներին մեղադրում են երկրի ներսում ահաբեկչական ակտերի իրականացման նպատակով «օտարերկրացի կազմակերպությունների» հետ դավադրության և «ռազմական գաղտնիքն այլ երկրի հայտնելու» համար:
Նրանք նաև մեղադրվում են ահաբեկչության ֆինանսավորման, «Մուսուլման եղբայրներ» միջազգային ցանցի առաջադրանքների կատարման համար ակտիվիստների ռազմական պատրաստության և մի շարք այլ գործողությունների մեջ, որոնք ազդել են Եգիպտոսի ինքնիշխանության և տարածքային ամբողջականության վրա:
Նոյեմբերի 19-ին փակ լսումների ժամանակ դատախազը հայտարարել է, որ մեղադրյալներն իրենց կառավարման ընթացքում մի շարք արտասահմանյան հետախուզությունների, մասնավորապես՝ Իրանի հատուկ ծառայություններին գաղտնի փաստաթղթեր են փոխանցել: Բացի դրանից՝ դատախազը նրանց մեղադրել է երկրում մթնոլորտի ապակայունացման նպատակով զինված խմբավորումների, այդ թվում՝ ՀԱՄԱՍ-ի հետ համագործակցության համար:
