Սյունիքի մարզի ընդհանուր իրավասության դատարանում Նապոլեոն Օհանյանի նախագահությամբ ավարտվել է պայմանագրային զինծառայող Վրեժ Բ.-ի գործի դատական քննությունը:
Ըստ դատական ակտի՝ 24-ամյա շարքային Վրեժը 2013 թվականի դեկտեմբերի 25-ից փաստական ամուսնական հարաբերությունների մեջ է եղել անչափահաս՝ 16-ամյա Լաուրայի (անունը փոխված է) հետ:
2014 թվականի մարտի 13-ին, անչափահաս կնոջը խանդելով ուրիշ տղամարդկանց հետ գաղտնի շփվելու համար, Վրեժը Սյունիքի մարզի գյուղերից մեկում, իր տատի տանը ժամը 18-ից մինչև 19-ն ընկած ժամանակահատվածում, ինչպես նաև հաջորդ օրվա՝ մարտի 14-ի առավոտյան Լաուրային խոշտանգել է:
Նա դիտավորությամբ կնոջ մարմնի տարբեր մասերին պարբերաբար ուժեղ հարվածներ է հասցրել, պատճառել է ֆիզիկական ցավ, կնոջը զրկել է շարժվելու հնարավորությունից՝ կապկպել է, նրա կամքին հակառակ կտրել է գլխի մազերը:
Լաուրան մի կերպ ազատվել է վրիժառու տղամարդու ձեռքից, բայց Վրեժը բռնել է նրան, ձեռքերը ոլորելով վերադարձրել տուն՝ իր գործողություններով կնոջը պատճառելով հոգեկան ու ֆիզիկական տառապանք և թեթև վնասի հատկանիշներ չպարունակող վնասվածքներ:
Բացի այդ, մայիսի 16-ին, ժամը 18-ի սահմաններում նույն շարժառիթով Վրեժը բազմաթիվ հարվածներ է հասցրել Լաուրայի գլխին և ուսերին՝ պատճառելով թեթև վնասի հատկանիշներ չպարունակող վնասվածքներ:
Մայիսի 26-ին, ժամը 22-ի սահմաններում Վրեժը Լաուրայի վարձակալած բնակարանում դարձյալ ծեծել է նրան՝ երկու անգամ ապտակել ու մեկ անգամ ոտքով հարվածել է Լաուրայի որովայնին՝ պատճառելով ֆիզիկական ցավ:
Մայիսի 27-ին Վրեժը ձերբակալվել է, իսկ մայիսի 30-ին Սյունիքի մարզի ընդհանուր իրավասության դատարանը մերժել է Վրեժին կալանքի տակ առնելու միջնորդությունը, նրա նկատմամբ խափանման միջոց է ընտրվել ստորագրությունը չհեռանալու մասին:
Նույն դատարանի որոշմամբ, հաշվի առնելով, որ ամբաստանյալ Վրեժը և տուժող Լաուրան հայտարարել են հաշտության մասին, կարճվել է անչափահաս կնոջը ծեծելու երկու դրվագով հարուցված քրեական գործի վարույթը, այդ դրվագներով դադարեցվել է Վրեժի քրեական հետապնդումը:
Ընդհանուր իրավասության դատարանը այնուհետև քննել է միայն անչափահաս կնոջը խոշտանգելու մեղադրանքով գործը:
Այդ մեղադրանքը Վրեժ Բ.-ն դատարանում լիովին ընդունել է, իրեն մեղավոր է ճանաչել, հայտնել է, որ զղջում է, ու միջնորդել է, որ գործը քննվի արագացված կարգով:
Տուժողը և մեղադրողը չեն առարկել:
Գործը քննելով արագացված կարգով՝ ընդհանուր իրավասության դատարանը Վրեժ Բ.-ին մեղավոր է ճանաչել անչափահաս կնոջը խոշտանգելու համար՝ ՀՀ քրեական օրենսգրքի 119 հոդվածի 2-րդ մասի 3-րդ կետով:
Դատարանը հաշվի է առել, որ Վրեժի խնամքին են ծնողները, տատը և եղբայրը: Նման պայմաններում նա դեռ անչափահաս աղջկան էլ որպես փաստական կին է պահել…
Զինվորական ծառայության ընթացքում, ըստ դատական ակտի, Վրեժը բնութագրվել է… բացասական:
Դատարանը Վրեժ Բ.-ին դատապարտել է 3 տարի ազատազրկման, այս պատժից հանել է նախնական կալանքի տակ Վրեժի գտնվելու 3 օրը ու վերջնական պատիժ է սահմանել 2 տարի 11 ամիս 27 օր ազատազրկումը:
Այնուհետև դատարանը կիրառել է պայմանական դատապարտություն և Վրեժ Բ.-ի նկատմամբ սահմանել է 2 տարի փորձաշրջան:
Դատավճիռն արդեն բողոքարկվել է մեղադրողի կողմից: Դատախազը պահանջել է, որ վերաքննիչ դատարանը բեկանի դատավճռի՝ պայմանական դատապարտություն կիրառելու մասը և Վրեժ Բ.-ին դատապարտի 2 տարի 11 ամիս 27 օր իրական ազատազրկման: