«Դրամի արժեզրկումը պետք է սպասված համարել այն իմաստով, որ մեր արտաքին առևտրում մենք ունենք բավական լուրջ վիճակ վատ իմաստով, որովհետև մենք ավելի շատ ներմուծում ենք, քան թե արտահանում»,- «Առաջին լրատվական»-ի հետ զրույցում ասաց Հայրենական ապրանքարտադրողների միության նախագահ Վազգեն Սաֆարյանը:
Հիշեցնենք, որ վերջին մի քանի օրերին դրամը դոլարի նկատմամբ արժեզրկվել է մոտ 20 դրամով: Ճիշտ է, այդ արժերկումը թե տնտեսական շուկայում, թե ազգաբնակչության մեջ շոկային իրավիճակ է առաջացրել, բայց Հայաստանի տնտեսության համար, մեծ հաշվով, այն կարելի է դրական քայլ համարել: Տարիներ շարունակ տնտեսագետները բարձրաձայնում են, որ դրամի արժևորումը ներմուծումը խթանելու քայլ է, և հակառակը՝ արտադրությանը վնասող երևույթ: Դոլարը, հիշեցնենք, սկսեց արժեզրկվել 2006 թվականից և 580-590 դրամից իջավ մինչև 300 դրամը: Եվ հենց այդ ժամանակից սկսած՝ Հայաստանի ներմուծման ու արտահանման բացասական հաշվեկշիռը սկսեց մեծ տեմպերով ավելանալ: Ներմուծողներն իրենց ապրանքն այստեղ իրացնելով՝ գնում են էժան դոլար և դրանով կրկին ապրանք են ներմուծում: Դրա հետևանքով տեղական արտադրությունը, չդիմանալով ներմուծվող համեմատաբար էժան ապրանքների ճնշմանը, սկսում է կրճատվել և անկում գրանցել:
«Դրամի թուլացումը կբերի նրան, որ մենք կարողանանք ավելի շատ արտահանել: Եվ ես կարծում եմ, որ ազգային դրամի և դոլարի միջև մենք պետք է անպիսի միջակայք գտնենք, որ կարողանանք հավասարակշռել ներմուծումն ու արտահանում: Դրա համար էլ կարծում եմ, որ դրամի արժեզրկման այս մոտեցումը ճիշտ է: Մինչև այժմ մեր տարադրամային քաղաքականությունը ավելի շատ նպաստել է ներմուծմանը և ավելի քիչ՝ արտահանմանը»,- ասում է Վ. Սաֆարյանը:
Հիշեցնենք, որ դրամի արժեզրկման առաջին փուլը տեղի ունեցավ 2009 թ. մարտի 3-ին, երբ 1 դոլարի գինը 300 դրամից հասավ 380 դրամի: Եվ դրանից հետո բավական դանդաղորեն արժևորվելով՝ 1 դոլարը հասավ 410 դրամի: Այս օրերին կարծես թե գրանցվում է դրամի արժևորման հերթական փուլը, և մասնագետների կարծիքով՝ այս փուլում 1 դոլարի արժեքը կարող է հասնել 450 դրամի:
Ավելին՝ տեսանյութում:
