Անգլիայի հավաքականի նախկին ֆուտբոլիստ Դևիդ Բեքհեմը Hello պարբերականին պատմել է նոր ֆիլմի՝ «Դևիդ Բեքհեմ. Ճանապարհորդություն դեպի անհայտություն» և իր մեծ ընտանիքի նախընտրած ուտեստների մասին:
«Երբ ես գտնվում էի Իտալիայում, շատ էի ցանկանում մասնակցել խոհարարական դասընթացների: Իմ երեխաները պաստա շատ են սիրում, այդ իսկ պատճառով ես մտածեցի՝ իսկ ինչո՞ւ ոչ: Եվ սովորեցի պատրաստել իսկական իտալական պիցա: Վիկտորյայի հետ ավելի հեշտ է. նա սիրում է բանջարեղեն և աղցաններ»,- պատմել է Դևիդ Բեքհեմը, ով Միլանում ավարտել է վեցամսյա խոհարարական դասընթացներ:
Դևիդի ամենասիրելի կերակուրը ռիզոտոն է: Իտալական խոհանոցից զատ, Բեքհեմը համտեսել է Սինգապուրի, Վիետնամի, Հոնկոնգի ամենանրբագեղ ուտեստները և ակտիվորեն կիսվել է դրանցով ֆեյսբուքյան իր էջում:
«Ես այնքան շատ էի բացակայում տնից, երբ զբաղվում էի պրոֆեսիոնալ ֆուտբոլով: Հիմա ես զգում եմ, որ պետք է ամբողջությամբ նվիրվեմ իմ հարազատներին»,- ասել է Բեքհեմը: