Ռուսաստանի դեմ պատժամիջոցները անհրաժեշտ կլինեն այնքան ժամանակ, մինչև Մոսկվան չսկսի ակտիվորեն մասնակցել ուկրաինական ճգնաժամի հաղթահարմանը: Այս մասին, ինչպես հաղորդում է Reuters-ը, հայտարարել է Գերմանիայի կանցլեր Անգելա Մերկելը եվրոպական ընտանեկան ձեռնարկությունների համագումարին:
Մերկելի խոսքով՝ պատժամիջոցները կկիրառվեն այնքան ժամանակ, մինչև Ռուսաստանի ներդրումը ուկրաինական ճգնաժամի հաղթահարման գործում էական չլինի: «Դրանք անուսափելի են»,- հայտարարել է Մերկելը՝ խոստովանելով, սակայն, որ պատժամիջոցները վնասում են ոչ միայն ռուսական, այլև գերմանական և եվրոպական տնտեսություններին:
«Սակայն ձեռնարկությունների համար ոչինչ ավելի կարևոր չէ, որքան իրավական անվտանգությունը, կայունությունը և խաղաղությունը՝ որպես հաջող տնտեսական գործունեության համար հիմնական նախադրյալներ»,- ընդգծել է Մերկելը: Նա նաև նշել է, որ եվրոպացի քաղաքական գործիչները շարունակում են աշխատել ճգնաժամի քաղաքական կարգավորման ուղղությամբ:
«Մենք անխոնջ աշխատում ենք այդ ճգնաժամի դիվանագիտական լուծման համար, որը, ցավոք սրտի, շարունակում է վնասել Ուկրաինայի տարածքային ամբողջականությանը»,- ասել է Մերկելը:
