Երևանի «Չաո բամբինո» մանկական սրճարանում նոյեմբերի 19-ի երեկոյան գազով լցված փուչիկների պայթյունի գործով Կենտրոն և Նոր Նորք վարչական շրջանների քննչական բաժնում հարուցվել է քրեական գործ ՀՀ Քրեական օրենսգրքի 279-րդ հոդվածի 2-րդ մասի 1-ին կետով (Անվտանգության պահանջներին չհամապատասխանող ապրանքներ թողարկելը, որոնք կատարվել են մանկահասակների համար նախատեսված ապրանքների կապակցությամբ): Այս մասին տեղեկացնում է քննչական կոմիտեն:
Հիշեցնենք, որ դեպքը տեղի էր ունեցել նոյեմբերի 19-ին «Չաո բամբինո» մանկական սրճարանում ծննդյան արարողության ժամանակ: Երեխաները գազով լցված փուչիկներով մոտեցել էին տորթին, որի հրավառությունից պայթյուն էր առաջացել, և երեք երեխա տարբեր աստիճանի այրվածքներ էին ստացել ու հիվանդանոցում անհրաժեշտ բուժօգնություն ստանալուց հետո դուրս գրվել:
Քրեական գործ հարուցվել է հիվանդանոցից ստացված ահազանգի հիման վրա: Սրճարանի տնօրինությունն էլ գոհ է, որ գործ է հարուցվել, քանի որ կողմնակից են, որ իրենց փուչիկներ մատակարարողները պատժվեն դրանք ոչ ճիշտ գազով լիցքավորելու համար:
Հիշեցնենք, որ դեպքից հետո մանկական սրճարանի տնօրեն Գրիշա Հարությունյանն «Առաջին լրատվական»-ի հետ զրույցում ասել էր, թե իրենց փուչիկներ է մատակարարում «Փուչիկների աշխարհ» ՍՊԸ-ն, որը լիցենզավորված ընկերություն է և մասնագիտացած է այդ գործում, բայց իրենք փուչիկները ստանալուց հետո չեն կարող ստուգել, թե ինչով են դրանք լիցքավորված: Ավելի ուշ, սակայն, պարզվեց, որ ոչ մի լիցենզավորված ընկերություն էլ չկա: Փուչիկները սրճարանին մատակարարում է Արթուր Կտեյան անունով մասնավոր ձեռներեցը, որը դրանք լիցքավորել է իր ավտոտնակում, այն էլ ոչ թե հելիումով, այլ սովորական այրվող գազով:
Մանկական սրճարանի տնօրենը, այսօր «Առաջին լրատվական»-ի հետ զրույցում անդրադառնալով վերը նշվածին, ասաց, թե պարզել է, որ նման գործունեության համար լիցենզիա հարկավոր չէ: «Պարզապես մարդ պետք է իր խիղճը չկորցնի նման արարք թույլ տալու համար: Սա բացարձակ անփութություն է: Իրենց այդ գործունեությունը պայմանագրային էլ չէ, հելիումով լիցքավորելն էլ արտոնագրային չի, միայն ներկրողներն են արտոնագրվում: Պարզապես այս դեպքում էլ մարդ պետք է իր քայլերի մասին մտածի»,- ասաց սրճարանի տնօրենը: Նա փոխանցեց նաև, որ իրենք իրավապահներին տրամադրել են բոլոր անհրաժեշտ նյութերը, տեսախցիկների տեսագրությունները, թե ինչպես է եղել դեպքը, ովքեր են բերել փուչիկները և այլ մանրամասներ:
Հարությունյանը նշեց, որ իրենք պարբերաբար կապվում են երեխաների ծնողների հետ, իրենց օգնությունն են առաջարկում, որից ծնողները հրաժարվել են: Տնօրենը վրդովված էր, որ դեպքի օրը ապատեղեկատվություն է տարածվել, թե պայթյունի պատճառով երեք երեխա է տեղափոխվել հիվանդանոց, նրանցից մեկը, որը 10 տարեկան է եղել, ստացել է առաջինից երկրորդ կարգի այրվածք, մյուս երկուսը՝ վնասվածքներ դեմքի և վզի հատվածում։ «Ես անձամբ եմ զանգահարել հիվանդանոց, զրուցել բժշկի հետ: Հիվանդանոցում գրանցվել է ընդամենը 9 տարեկան 1 տղա երեխա, որը ալբինոս է, իսկ նրանց մաշկը շատ նուրբ է, դրա համար էլ վնասվածքները մեծ են եղել: Մյուս երեխաները չեն հոսպիտալացվել, և հիմա նրանց վիճակը շատ լավ է»,- եզրափակեց տնօրենը՝ վերջում ավելացնելով, որ իրենց սրճարանի մուտքին արդեն գրություն է փակցված, որով արգելվում է այցելուներին դրսից փուչիկներ բերել իրենց հետ: Իսկ սրճարանում միայն օդով լցված փուչիկներ են լինելու:
Ինչ վերաբերում է Արթուր Կտեյանին, ապա նա ընդհատակ է անցել: «Չաո բամբինո»-ին տված նրա այցեքարտի վրա նշված հեռախոսահամարները չեն պատասխանում, բացի մեկից, որը հայտարարում է, թե ինքը որևէ կապ չունի փուչիկների հետ: