Ծոցի արաբական երկրների համագործակցության խորհրդի (ԾԱԵՀԽ) անդամները դեկտեմբերի 9-ին Կատարում կհայտարարեն միասնական ռազմական հրամանատարության ստեղծման մասին, որի գրասենյակը կտեղակայվի Սաուդյան Արաբիայի մայրաքաղաք Էռ-Ռիադում: Այս մասին Լոնդոնում հրատարակվող Al- Sharq Al-Awsat պարբերականին հայտնել է Խորհրդի բարձրաստիճան ռազմական աղբյուրը:
«ԾԱԵՀԽ-ի կոմիտեները, որոնք աշխատել են անցյալ տարի Քուվեյթում գագաթնաժողովի ժամանակ ընդունված միասնական ռազմական հրամանատարություն ստեղծելու որոշման իրագործման վրա, ավարտել են իրենց աշխատանքը, և նման կազմակերպության ստեղծման մասին հայտարարություն նախատեսվում է անել Դոհայում անցկացվելիք գագաթնաժողովին»,- նշել է աղբյուրը: Նրա խոսքով՝ միասնական ռազմական հրամանատարություն ստեղծելուց հետո էլ Ծոցի երկրների ռազմական համագործակցությունը կընթանա նախկինի պես:
Աղբյուրը հայտնել է, որ, հնարավոր է, նոր ռազմական հրամանատարության վրա դրվի Ծոցի երկրների և ահաբեկչության դեմ միջազգային կոալիցիայի (որի մեջ մտնում է ավելի քան 40 երկիր) միջև գործողությունների համակարգման պարտականությունը: Ներկայում այդ կոալիցիան օդային հարվածներ է հասցնում ԴԱԻՇ և «Ջեբհաթ ալ-Նուսրա» ահաբեկչական կազմակերպություններին Սիրիայում և Իրաքում:
ԾԱԵՀԽ-ի արտգործնախարարներն այսօր Կատարում հավաքվել են Խորհրդի գագաթնաժողովի նախապատրաստման համար, որը, ինչպես սպասվում է, կկայանա դեկտեմբերի 9-10-ին Դոհայում: ԾԱԵՀԽ-ի արտգործնախարարները հանդիպմանը կքննարկեն ԴԱԻՇ խմբակցության դեմ պայքարը, տարածաշրջանում Իրանի հետ հարաբերությունները և իսրայելա-պաղեստինյան հակամարտությունը:
