Թուրքմենստանում ԱՊՀ վարչապետների հավաքը, որին մասնակցել է նաև Հայաստանի վարչապետը, Հովիկ Աբրահամյանի համար ունեցել է հետաքրքրական մի առանձնահատկություն. հավաքի շրջանակում տեղի չի ունեցել Հովիկ Աբրահամյանի հանդիպում ՌԴ վարչապետ Մեդվեդևի հետ: Սա կարելի է ԱՊՀ վարչապետների հավաքների առումով Հայաստանի մասով աննախադեպ որակել, երբ չի լինում Հայաստանի և Ռուսաստանի վարչապետների հանդիպում ԱՊՀ վարչապետների նիստի շրջանակում:
Կասկած չկա, ինչ խոսք, որ Հովիկ Աբրահամյանը շատ կուզեր նման հանդիպում ունենալ` հատկապես այն բանից հետո, երբ սեպտեմբերին տապալվեց ՌԴ վարչապետի ազդարարված այցը Հայաստան` այն դեպքում, երբ ազդարարողը հենց ինքը Հովիկ Աբրահամյանն էր: Նա հայտարարեց, որ սեպտեմբերի 8-9-ին Հայաստան է գալու Դմիտրի Մեդվեդևը: Սակայն Մեդվեդևի այցը չկայացավ: Մինչդեռ եթե Հովիկ Աբրահամյանը հանձն էր առել հայտարարել այցի մասին, կնշանակի ուներ այցի վերաբերյալ հստակ երաշխիքներ: Իսկ այդ դեպքում այցի չկայանալը դառնում է իսկապես արտառոց մի բան:
Եվ փաստորեն, Հովիկ Աբրահամյանի «արտառոց» ՝ բացասական իմաստով արտառոց հարաբերությունները Ռուսաստանի հետ շարունակում են ուժի մեջ մնալ, այսինքն` Աբրահամյանը շարունակում է Ռուսաստանում մնալ, ըստ էության, շնորհազուրկի կարգավիճակում: Թե ինչու է ռուսական կողմը, այսպես ասած, բոյկոտում Հովիկ Աբրահամյանին` դժվար է ասել, բայց կասկածից վեր է, որ այդ վերաբերմունքն էլ Հայաստանում է իր արտացոլանքը ունենում Հովիկ Աբրահամյանի հանդեպ ներիշխանական կամ ներքաղաքական դաշտի սուբյեկտների վերաբերմունքի մեջ: Եվ պատահական չէր, որ նախորդ շաբաթ Ազգային ժողովում իրար հետևից տապալեցին Աբրահամյանի կառավարության մի շարք նախագծեր:
Ինչո՞ւ կամ ինչո՞վ է Հովիկ Աբրահամյանն այդպես բարկացրել ռուսներին` կդժվարանանք ասել, սակայն որ Հայաստանի ներքաղաքական դաշտում ռուսաստանյան կողմից շնորհազուրկ լինելու կամ թեկուզ ընդամենը ընդունելության չարժանանալը իշխանական համակարգում հավասարազոր է քաղաքական մահվան, մենք ականատես ենք եղել բազմիցս:
Սա էլ իր հերթին բնականաբար կմտահոգի բոլոր այն մարդկանց, ում համար Հովիկ Աբրահամյանը կամ հավակնորդ է, կամ առնվազն ցատկահարթակ: Երկու դեպքում էլ Մոսկվայի վերաբերմունքը առ այսօր բոլորովին բարվոք չէ բոլոր նրանց համար, ովքեր քաղաքական ինչ-որ հույսեր էին փայփայում Հովիկ Աբրահամյանի հետ:
Լուսանկարը՝ armtimes.com-ի