Անբնական եղանակը, որը նոյեմբերի 17-21-ը վրա է հասել ԱՄՆ-ի հյուսիս-արևելյան շրջաններին, հանգեցրել է ջերմաստիճանի անկման և որոշ նահանգներում փոթորիկի (որոշ քաղաքներում երեք օրում տեղացել է ձյան տարեկան նորման, որն իշխանություններին ստիպել է արտակարգ իրավիճակի ռեժիմ հայտարարել): Եղանակային արտակարգ իրավիճակը պատճառների և գլոբալ տաքացման հետ կապի մասին է հաղորդում New Scientist-ը:
Նորմայում սառը օդը Հյուսիսային բևեռը շրջապատող քամիների կողմից պահվում է արկտիկական շրջաններում: Այդ քամիների մեջ ամենաուժեղը բարձր շիթային հոսանքներ(ԲՇՀ) կազմող քամիներն են: Սովորաբար ԲՇՀ-ն անընդհատ փոփոխում է իր հետագիծը, սակայն նոյեմբերի կեսերին այն անսովոր մեծ շղթայով տարածվել է ԱՄՆ-ի տարածքի վրա: Արդյունքում տաք հոսանքը հասել է մինչև Արկտիկա, իսկ սառը օդային զանգվածները՝ մինչև Տեխաս:
Նոյեմբեր ամսին տեղացած ձյունը և անցած տարիների եղանակային այլ անբնական երևույթները գիտնականներն ավելի հաճախ կապում են ԲՇՀ-ի հետ: Գլոբալ տաքացումն ապակայունացնում է ԲՇՀ-ն, որի հետևանքով շղթայի հանգույցներն ավելի լայն են դառնում, կամ երկար ժամանակով մնում են նույն տարածքում: Այս երևույթն էլ դառնում է անբնական ցրտի, տաքության և տեղումների պատճառը: Դրանից բացի, գլոբալ տաքացման հետևանքով բարձրանում է օդի խոնավությունը, որի պատճառով նույնպես շատանում են տեղումները:
Իսկ Բուֆալոյում տեղացած ձյան ռեկորդային քանակը կապված է տեղային պատճառների հետ: Այն տեղի է ունենում այն ժամանակ, երբ սառը օդը, անցնելով Էրի լճի վրայով, հագենում է ջրային գոլորշով և տաքանում է ներքևից, որի հետևանքով էլ ամպեր են առաջանում և սահմանափակ տարածքում աննախադեպ տեղումներ են գրանցվում: Այսպես, մինչև Բուֆալոյում ձյան ծածկույթը հասել է կես մետրի, դրանից ընդամենը մի քանի կիլոմետր հեռավորության վրա գտնվող քաղաքներում այն մի քանի սանտիմետր էլ չկա: