Նոր տարուց սկսած՝ երգչուհի Ռիհանան առավել սերտ համագործակցություն կսկսի սպորտային Puma ապրանքանիշի հետ՝ դառնալով նրա հագուստի և կոշիկների գլխավոր դիզայներներից մեկը: Այս մասին երգչուհին հայտարարել է Vogue ամսագրի փետրվարյան համարին տված հարցազրույցում:
«Ես չեմ թելադրելու նրանց իմ կանոնները: Կան մարդիկ, ովքեր ինձանից շատ ավելի տաղանդավոր են, եթե նույնիսկ խոսքը վերաբերում է երգեցողությանը: Կան հզոր ձայներ ունեցող մարդիկ: Սակայն մարդիկ ցանկանում են իմանալ, թե ով եմ ես: Նորաձևությունը հզոր խթան է, որով կարող ես ցույց տալ քո տրամադրությունը և վերաբերմունքը ինչ-որ բանի նկատմամբ»,- պատմել է երգչուհին:
The Washington Post պարբերականի տեղեկությամբ՝ երգչուհին կունենա անձնական համակարգող, որը կզբաղվի նրա գաղափարներով, ինչպես նաև կրտսեր օգնական: Նախագծի շրջանակներում երգչուհին կզբաղվի սպորտային կոշիկների դիզայնով, ինչպես նաև լասինաների և տոպերի ձևավորմամբ:
Ծրագրի շրջանակներում՝ հավաքածուի շնորհանդեսից առաջ, երգչուհին հասարակության մեջ կհայտնվի իր ստեղծած սպորտային կոշիկներով, ինչպես նաև կկրի ապրանքանիշի այլ իրեր: Իր կատարած աշխատանքի համար Ռիհանան կստանա մեկ միլիոն դոլար: Պայմանագիրը դեռևս կնքված չէ, սակայն երգչուհին արդեն հաստատել է նախագծում իր մասնակցությունը:
Հիշեցնենք, որ մինչ այս բարբադոսցի երգչուհին աշխատել է այնպիսի հայտնի ապրանքանիշերի համար, ինչպիսիք են Armani նորաձևության տունը, River Island խանութների ցանցը, HardRock Cafe-ն, M.A.C. ընկերությունը: