«ԵԱՀԿ Մինսկի խումբն առնվազն անտարբերություն ու անկարողություն ցուցաբերեց խոցված ուղղաթիռի անձնակազմի դիերը տարհանելու հարցում»,- «Առաջին լրատվական»-ի հետ զրույցում ասաց ՌԱՀՀԿ տնօրեն Մանվել Սարգսյանը՝ ի պատասխան մեր հարցի, թե ի՞նչ հետևանքներ կունենա այն հանգամանքը, որ Հայաստանը ինքնուրույն քայլեր ձեռնարկեց՝ տեսնելով, որ Մինսկի խումբն ի զորու չեղավ լուծել խնդիրը:
«Չգիտեմ թե ինչպես կազդեն այս դեպքերը հետագա գործունեության վրա: Բայց այն հանգամանքը, որ իսկապես Մինսկի խումբն առնվազն անտարբերություն ու անկարողություն ցուցաբերեց՝ իհարկե, մտածելու տեղիք է տալիս։ Ի վերջո՝ այդ մարդկանց որոշումը ո՞րն է, նրանք իսկապե՞ս անկարող էին, թե՞ ուղղակի այդպես պահեցին իրենց: Թվում էր՝ խոշոր երկրների ղեկավարներ են, և նման հարցերում խնդիրներ չպետք է լինեին, բայց փաստորեն եղան: Կապել իրար հետ և ասել, թե գործընթացի վրա ինչպես կազդի՝ այնքան էլ ճիշտ չէ: Միջադեպը լինում է, հետո կարծես ամեն ինչ մոռացվում է, գործունեությունը՝ վերականգնվում»:
Մեր ան դիտարկմանը, որ Հայաստանը մշտապես Մինսկի խմբի ձևաչափը պահպանելու կողմնակից է եղել՝ ի տարբերություն Ադրբեջանի, բայց հիմա փաստորեն ինքնուրույն գործողությունների է անցնում, և հարցին՝ կա՞ վտանգ, որ ի վերջո այդ խումբը կկազմալուծվի, Մանվել Սարգսյանը պատասխանեց. «Ո՛չ, դա միայն այն ժամանակ կլինի, երբ ստեղծվի նոր միություն կամ մոտեցում, բայց դա դեռ գոյություն չունի, ուստի առայժմ կպահպանվի»:
Մանվել Սարգսյանի կարծիքով՝ Ադրբեջանն ընդամենը խոսում է, բայց նրա համար շատ ավելի ձեռնտուէ խումբը. «Ուղղակի շանտաժ են անում, որ փորձեն Մինսկի խմբի միջոցով իրենց դիրքորոշումները պաշտպանել, բայց դա չի նշանակում, թե Ադրբեջանին խումբը ձեռնտու չէ: Մինսկի խումբն Ադրբեջանի համար գտած բան է»,- եզրափակեց նա:
